Pathsala, K’lyngkot 20 : Ha kawei ka jingjia kaba sngewtriem, uwei u samla 24 snem rta la suba ba ula khlad noh hadien ka jingshah bom shah tied ha u paidbhur ha ki bynta jong ka Bajali hapoh Assam ha ka sngi Balang ba la lah.
Ia une u lanot la tip kyrteng kum u Dhruba Joyti Choudhury uba dei na ka shnong Kumarpara kaba hapoh Bajali, Assam.
Katkum ki tyllong khubor ia u Choudhury la lapdien hapdeng ka jingmynsaw kaba jur ha kaba la pynkit noh mardor shapoh GNRC hospital ha Guwahati ha kaba ula khlad noh tang hadien katto katne por.
Watla ym pat lah ban tip ia ka daw ha lyndet jong kane ka jingshah pyniap ka jong u, hynrei ki dien mong ha ka met jong une u samla ki pynpaw shai ba ula ngat ha ka jingshah thombor kaba triem, ong ki tyllong khubor.
Ha kawei pat ka bynta, na ka liang kiba haiing hasem jong une u lanot kila ujor da ka FIR hapoh Patacharkuchi police station ha Assam, da kaba kynnoh ba u Choudhury ula shah pyniap dusmon.
Shuh shuh ki tyllong khubor ki la kam ba kane ka jingjia shah bom shnong ka don ruh ia ka jingadei bad kawei pat ka jingjia kaba la jia ha ka 16 tarik mynta u bnai, ha kaba uwei u briew ia uba la tip kyrteng kum u Bipul Das u la shah pyniap noh na ka jingjia tyngkhuh kali.
