Shillong, K’Lyngkot 17: Ka Indian National Congress hynne ka sngi ba-ar, kala kyntu iaki paidbah ka Meghalaya ban ai jingsneng iaka Bharatiya Janata Party (BJP) ha kane ka ilekshon MLA-2023 halor ka jingbyrngem ba ka Jylla kan ym lah ban thaw sorkar khlem ka BJP.
Haba kren sha ki lad pathai khubor u president ka Meghalaya Pradesh Congress Committee (MP) bah Vincent Pala ula ong ba kane ka jingkam ba ka BJP ba ym lah ban thaw sorkar khlem ka BJP ka pyni ba ka dei tang ka jingbyrngem iaki paidbah ka Meghalaya.
“Namar kane ki paidbah ka Meghalaya kidei ban shim nuksa na ki paidbah ka West Bengal kiba ai jingsneng iaka BJP da ka ba kyntait ia kane ka Party hadien ba ka byrngem ba ym lah ban thaw sorkar khlem ka BJP” la ong u bah Pala.
U MP ka Congress na Assam u Gourav Gogoi ula ong ba ka BJP ka shu kren tang ka ktien hynrei ha ka ilekshon ba dang shu dep ha Delhi, Gujarat bad Himachal Pradesh, ka BJP ka jop tang ha kawei ka jylla.
U Gogoi ula ong ba ka BJP ka iakhun ilekshon daka pisa hynrei ka Congress ka iakhun ilekshon daki kam ba ka party la leh naka bynta ki paidbah.
“Namar kane ka Congress ka ngeit skhem ba ka jinglah jong ka Party ban trei naka bynta ki paidbah kan khring iaki paidbah ka Meghalaya ban bteng ban ai jingkyrshan iaka Congress” la ong u Gogoi.
