Shillong, K’Lyngkot 16: Ka United Democratic Party (UDP) hynne ka sngi kala pynkup burom iaki 55 ngut ki nongialam bad ki volunteer ka Hill State Movement lane ki dkhot kiba don bynta ha ka jingiakhih ban ioh jylla laka jong.
Ia kine ki nongialam bad ki Volunteer ka Hill State Movement la pynkup burom da u President ka UDP bah Metbah Lyngdoh ha ka jingdon lang u Myntri ka tnat PHE bah Renington Lyngdoh Tongkhar, u MLA ka Nongkrem bah Lambor Malngiang, MDC ka Jaiaw bah Paul Lyngdoh lem bad kiwei ki nongialam ka Party.
Haba kren ha kane ka sngi, u bah Metbah ula ong ba kane ka jingpynkup burom ka UDP iaki nongialam bad dkhot ka Hill State Movement kam dei ban tang ban kynmaw iaka jingnoh synniang kine ki riew khraw naka bynta ban ioh iala ka jong ka jylla hynrei ka dei ruh ban tip shaphang ka jingiaid lynti jong ka jingialeh naka bynta ban ioh iala ka jong ka jylla ba pura.
U bah Metbah ula ong ba naka liang ka UDP hadien ka ilekshon kan thaw ruh daka Committee ha ka jingdon lang ki Professor bad ki stad wad bniah khnang ban lap shuh shuh iaka jingiaid lynti ka Hill State Movement naduh ba la sdang haduh ban da ioh ka jylla ba pura.
“Ka lah dei ka por ban thaw da ka Committee ban lum jingtip haba iadei bad ka jingiaid lynti ka Hill State Movement bad iaka jingiaid lynti dei ban thoh ha ki kot khnang ba ki paidbah ka jylla khamtam ki samla kin tip kumno ki riew khraw ka jylla ki ialeh naka bynta ban ioh iala ka jong ka jylla” la ong u bah Metbah.
U bah Metbah ula ong ba ki paidbah khamtam ki samla kila shu tip malum mala haba iadei bad ka jingiaid lynti ka Hill State Movement hynrei bun kim tip bniah namar kim don ba thoh shaphang ka jingiaid lynti bad dei namar kane la donkam ban don daka Committee ban thoh shaphang ka jingioh jylla ba pura ka Meghalaya.
Haba kren ha kane ka sngi ki nongialam bad ki volunteer ka Hill State Movement, ki la kyntu ia UDP ba ka don ka jyngkyrmen na ka ha kane ka kynti jong ka elekshon 2023 bad lada ki poi ha ka thong ba kin ioh ban ialam ia ka sorkar.
Ki la kyrpad ba kin ialeh ban kyntiew ia ki khun samla ka Jaidbyndriew khamtam ban kyntiew bad pynbha ban ioh ia ka jingnang jingstad, ka ioh ka kot ia ki khun samla khnang ban dang mih ki samla ki ba stad ki ba lah ban ialam ia ka Ri bad ka Jaidbyndriew.
