Shillong, Kyllalyngkot 12: U Myntri Khynnah ka Sorkar Pdeng uba khmih iaka Tnad Skill Development & Entrepreneurship bad Electronics & IT, u Rajeev Chandrasekhar, mynta ka sngi palei ula pynbna iaka jingplie iaka PMKVY 4.0 kum shi bynta jong ka Skill India Mission ha kaba yn ai jinghikai bapher bapher ia ki samla ha ka AI, Blockchain, ka jingmaramot ia ki mobile bad ki kali.
U Rajeev Chandrasekhar u la pynbna ia kane ha ka jingialang ha Ramakrishna Vivekananda Cultural Centre ha Shillong.
“Ngi ladep ai jinghikai pyntbit ha ki sap treikam ia kumba 20,000 ngut ki samla bad ngi thmu ban pyniar shuh shuh ia ka kam ha ka jylla Meghalaya ha ki 12 bnai ban wan” ong u Rajeev.
U Myntri ula pyndon burom ruh ia u Swami Vivekananda ha ka lyngkhuh sngi kha ba 160 jongu ia kaba la rakhe kum ka National Youth Day ha kylleng ka ri bad ula pyndon burom ruh ia u guru jong u Swami ji, u Ramakrishna Paramhansa.
U Rajeev ula ong ba ka long kaba paka bha ban rakhe ia ka sngi kha jong u Swami Vivekananda kum ka National Youth Day bad u Swami Vivekananda u long uba khlain ka jingngeit ha ka jingkiew kyrdan ka India bad ka bor jongka, ka jingsaindur thymmai bad ka jingkut jingmut jong ki samla jong ka ri.
Ula kren shaphang ka jingmih ka India ba thymmai hapoh ka jingialam u Myntri Rangbah duh, u Narendra Modi bad shaphang ki kabu kiba bun na ka bynta ka pule puthi, ka jingkyntiew ia ki sap treikam bad ki lad ioh kam na ka bynta ki samla mynta.
Une u Myntri ula iakynduh ia kito kiba trei ha ki kam khaii ha ka thain ha kaba ula batai ia ki sienjam kiba iadei bad ka jingkyntiew ia ki sap treikam hapoh ka PMKVY 4.0 ban pynkupbor ia ki samla bad ban plie ki lad iohkam bad ban seng kam lajong.
U Rajeev Chandrasekhar u la pynlong jingialang bad ki heh nongialam jong ka seng bad kren shaphang ka thong jong ka Sab ka Saath Sab ka Vikas jong u Myntri Rangbah duh u Modi bad ula iakynduh ia ki kynhun kiba trei na ka bynta ka imlang sahlang bad ula iaroh iaki na ka bynta ki kam jong ki.
