Shillong, K’lyngkot 5: Ka People’s Democratic Front (PDF) ha ka sngi balang, ka la pynbna ia ka thup kyrteng ba nyngkong jong ki phra ngut ki kyrtong ban mih aireng ha ka elekshon MLA – 2023.
U President ka PDF bad MLA ka Sohra bah Gavin Miquel Mylliem bad u Myntri Sorkar bad MLA ka Mawkynrew bah Banteidor Lyngdoh ki dei napdeng ki kyrtong ba la mynjur da ka Election Committee.
Kiwei pat ki kyrtong ki kynthup ia ubah Shemhok Garod na Raliang, Roswell Shadap na Mawhati, Donlang Sohkhlet na Umsning, Romeo Phira Rani na East Shillong, Eugenestar Kurkalang na Nongkrem bad Auspicious Lyngdoh Mawphlang na Mawphlang.
U Bah Gavin Mylliem ula pyntip ba ka party ka la iohpdiang ruh ia katto katne ki aplikashon na ki kyrtong ba kwah mih iakhun na ka PDF bad ia kane dang bishar da ka party shuwa ban shim ia ka rai ba khatduh.
Haba kylli, une u nongialam ka PDF ula ong ba ka party ka don jingthmu ban pynmih kyrtong na 10 lane 15 tylli ki constituency.
Hynrei ula ong ba ka party kam pat shim rai satia ban pynmih kyrtong na Mylliem Constituency watla u MLA ba mynta Bah Hamletson Dohling ula rai ba shen un sa pyniasoh noh sha ka NPP.
“Ngim lah ban khang ia kino kino ki MLA ban pyniasoh sha kiwei ki party watla kane kan ktah ia ka party” ula bynrap.
