Shillong K’lyngkot 04: Ka Jylla Meghalaya kaba don 60 ngut ki MLA, kan sakhi ha ka sien ba nyngkong eh ban don haduh 15 ngut ki MLA ki ban kynthih dingkper bad mih aireng na kiwei pat ki seng sain pyrthei ha ka elekshon MLA-2023 ha ka Jylla.
Haduh 15 ngut ki MLA jong kane ka samoi ba mynta kin sa iehnohkam bad ieh ia ki party barim, ban iakhun ia ka elekshon na kine ki seng ba kin iasoh thymmai.
Haduh mynta, hynriew ngut na kine ki MLA kila iehnoh ia ka kam long Nongmihkhmat bad kine ki kynthup iaka Ferlin Sangma (NPP), u Benedic Marak (NPP), Bah Himalaya Shangpliang (TMC) bad kine baroh 3 ngut kila leit ban pyniasoh noh bad ka seng BJP.
Nalor kane, ka Kong Ampareen Lyngdoh, Bah Mohendro Rapsang bad u Bah Kimfa Marbaniang ruh kila mih noh na ka seng Congress kaba ki don hapdeng ka jingshah suspon bad kila leit ban pyniasoh noh bad ka NPP.
La khmih lynti ba u MLA ka Mylliem u Bah Hamletson Dohling, u MLA ka Umsning Bah Jason Sawkmie Mawlong kiba na ka seng PDF ruh kin iehnoh ia ka jinglong MLA ban ioh pyniasoh bad ka NPP ban iakhun iaka elekshon MLA ban wan.
Kat kum ka khubor, u MLA ka HSPDP na Sohiong Bah Samlin Malngiang yn sa iehnoh ia ka kam MLA ban leit pyniasoh sha ka NPP bad na ka liang u Myntri Sorkar ka jylla u Bah ReniktonLyngdoh Tongkhar ruh ula pynkhreh ban iehnoh ia ka kam MLA ban ioh pyniasoh noh bad ka seng UDP.
Ki ar ngut ki MLA ka Congres kiba don hapdeng ka jingshah suspon kiba kynthup ia u MLA ka Nongpoh u Bah Mayralborn Syiem bad u MLA ka Mawlai Bah Process T Sawkmie ruh kila pynkhreh ban iehnoh ia ka jinglong MLA bad kin leit ban pyniasoh noh bad ka seng UDP.
Katkum ki khubor kiba la pawshai, wat u MLA ka KHNAM na North Shillong u Bah Adelbert Nongrum ula pynkhreh ban iakhun iaka elekshon ban wan naka seng VPP, u Samuel Sangma naka BJP bad u Bah Lambor Malngiang naka seng UDP haka elekshon ban wan.
