Shillong, K’lyngkot 5: U MLA ka NPP na Phulbari SG Estamur Mominin hynnin ka sngi balang, ula iehnoh kam kum u dkhot ka Meghalaya Legislative Assembly.
U Mominin ula aiti ia ka shithi iehnohkam ha u Lamphang ka Iingdorbar Bah Metbah Lyngdoh. Une u MLA un sa pyniasoh shen sha ka All India Trinamool Congress (AITC).
Kane ka la jia ruh hadien ba ka NPP ka la pynbna ia ka kyrteng u Lamphang barim ka Iingdorbar u AT Mondal kum u kyrtong na Phulbari Constituency.
Arngut ki MLA ka NPP ba kynthup ia ka Ferlin CA Sangma (Selsella) bad Benedic Marak (Raksamgre) kila iehnohkam bad leit pyniasoh sha ka Bharatiya Janata Party (BJP).
Haduh hynniew ngut ki MLA kila iehnoh ia ka kam nongmihkhmat mynta shuwa ka elekshon 2023, kaba la khate ia ka jingdon ki MLA sha ka 53 ngut na ka iing ba 60 ngut.
Kine ki kynthup ia i kong Ampareen Lyngdoh (East Shillong), Mohendro Rapsang (West Shillong), Kimfa S Marbaniang (Rambrai-Jyrngam) bad Himalaya Shangpliang (Mawsynram).
