Shillong, Nohprah 31 : Ka All India Trinamool Congress (AITC) hynnin ka sngi thohdieng, kala thalain tyngeh ia ka BJP halor ka jingbyrngem ban mudui sha ka Election Commission of India (ECI) pyrshah ia ka “We Card” skhim jong ka party bad ong ba kane kala sei madan ia ka jinglong pyrshah jong ka BJP ia ka bha ka miat ki paidbah.
“Kane ka dei ka jingpyrshang jong ka BJP ban khanglad ia ka skhim u paidbah kaba la pynwandur ban kyntiew ia ki briew ba duk ba raitoi. Kala sei madan ia ka jinglong pyrshah ka BJP ia kiba duk bad ba long pyrshah ia ki kam pynroi. Ka pyni ruh ba ka BJP kam burom ia ka jingdonkam jong ki paidbah ka Jylla Meghalaya” ong u Vice President ka AITC bad MLA ka Umroi Bah George B Lyngdoh ha ka kyrwoh.
Naduh ba pyllait ia ka skhim ha ka 13 tarik Nohprah da ka Chairperson ka AITC ka Mamata Banerjee, haduh 1.50 lak ngut ki longiing kila pynrung kyrteng ha ka We Card Scheme, kaba kular ban iarap pisa haduh T. 1000 shibnai ia ki longiing jong kawei pa kawei ka Longiing ha ka Jylla.
U Bah George ula ban jur ba ka We Card skhim ka dei na ka bynta ban shakri ia ki paidbah ka Jylla Meghalaya bad pyni ia ka jingthmu jong ka AITC lad aka wan ha ka bor synshar.
“Kum ia kine ki juh ki skhim la pyndonkam ha kylleng ki jaka ka Ri bad ha ki Ri ka Pyrthei ruh ha kaba kum kine ki skhim kila pynkupbor ia ki briew ban shim ia ka sienjam sha ka roi ka par…..Ngi pan ia ka jingkyrkhu bad jingkyrkhu na ki paidbah na ka bynta ka sorkar kaba tip ia kaei kaba ka dei ban leh ha kine ki san snem ym kum kito kiba pyrkhat tang ia ka lai bnai shuwa ka elekshon” ula bynrap.
Ha ka jingiakren bad ki lad pathai khubor hynnin ka sngi, u President ka BJP-Meghalaya Bah Ernest Mawrie ula ong ba ki Longimie kila ieng shabar ki jaka sher dara ka AITC ban pynrung kyrteng na ka bynta ka skhim.
Une u MLA ka Umroi ula sei madan ruh ia kiba bun ki khep halor ki jingkular ka BJP shuwa ka elekshon ha kylleng ki jylla hapoh ka Ri.
Ula ong ba ka BJP kala pynbiej ia ki paidbah ha ka kyrteng jong ki skhim na ka bynta ka bha ka miat shuwa ka elekshon hynrei ka ieng pyrshah pat ia ki jingtyrwa jong kiwei ki seng sain pyrthei da kaba ong ba ka dei ka “shortcut politics”.
“Shuwa ka elekshon Gujarat bad Himachal Pradesh, ka Sorkar PDeng kala ai ia ka skhim sam marbam ei (free food scheme) ba tang 3 bnai. Kala pynbna ruh ia kiba bun ki jingmyntoi ha Gujarat shuwa ka elekshon kaba kot haduh T.80,000 klur, kaba kynthup ia ka T. 29,000 klur ki project bala plie paidbah da u Myntri Rangbah duh dalade. Shuwa ka elekshon UP, u Myntri Rangbah Duh ula pynbna kynsaw ia ka song pisa ba T, 20.900 klur na ka bynta ka PM Kissan Samman Nidbi, kaban ai haduh T. 6000 sha ki paid nongrep. Hato ka BJP Meghalaya ka tip ia kine kiei kiei baroh” ula buh jingkylli.
