Shillong, Nohprah 23: Ka Youth Wing jong ka United Democratic Party (UDP) hynne ka sngi thohdieng, kala pyntip ba kan shimkhia iaki jingeh jong ki samla ka jylla halor ka jingkyrduh kam, ka jingktah jong u Drok bad kiwei kiwei ki mat kiba kongsan.
U Chief Youth Organiser ka UDP Youth Wing u Bah Eugeneson Lyngdoh haba iakren bad ki nongthoh khubor ula ong ka Youth Wing ka kwah ban pynleit jingmut halor ka ishu jong ka jingjyllei u drok khamtam haba une u jingdih uba sniew, ula poi ruh ha ki jaka kiba don ha kyndong kynshrot jongka jylla.
Ula ong, ha ki snem kiba la leit iaka nongbah Shillong la tip kum ka shlem jong ka pule puthi jong ka thain shatei lam mihngi,kunta ka seng ka thrang ba ia kane ka nam dei ban pynkhie im biang sa shisien.
Ula ong, ki duna bha ki khynnah samla ka jylla kiban pyndep iaki competitive exams kumta ka seng ka pynshlur ia ki samla ba kidei ban ialeh ia kine ki eksam bad ka Youth Wing kan wad ia ki lad ki lynti kumno ban iarap lem ia ki samla ka jylla.
U Bah Eugeneson ula ong, ka Youth Wing kan phaikhmat ruh ha kaba iadei bad ka kam jngohkai bad ban peit ba ki samla kin donbynta lang ha kane ka liang khnang ba kan long kum ka lad ba kin iohkam iohjam.
Ula kyntu ruh ia ki samla ba kin kyrshan iaka UDP bad ka seng kan pyrshang ban pdiang ia ki jingai jingmut jong ki samla bad ban shim ia ki ladnki lynti ban iarap ia ki bad ban weng iaki jingeh kaba ki samla ki mad hapoh ka jylla.
