Sngewskhem u Conrad ban ioh synshar marwei ka NPP ha u 2023
Shillong, Nohprah 19 : Ka Madan Iewrynghep, Firebrigade, hynne ka janmiet sngi nyngkong, kala dap da ki nongkyrshan jong ki 2 ngut ki MLA bad u MDC, kiba la wan pyniasoh thymmai sha ka National People’s Party (NPP) ban mih aireng ha ka elekshon MLA-2023.
Kine ki arngut ki MLA ki dei I Kong Ampareen Lyngdoh MLA ka East Shillong bad Bah Mohendro Rapsang MLA ka West Shillong, kiba dei ki MLA ba shah sospon ka Congress bad bala iehnohkam hynne ka sngi hi. U MDC pat u dei u Bah Emlangki Lamare uba mihkhmat ia ka Narpuh Constituency.
We are so happy to welcome Hon’ble MLAs, Smti. @ampareenlyngdoh, Sh. Mohendro Rapsang and Hon’ble MDC Sh. Emlangki Lamare to the NPP family.
They bring with them the love and affection of the people. We are stronger by their support. pic.twitter.com/aq3ukAMOAj
— Conrad Sangma (@SangmaConrad) December 19, 2022
Ia kine 3 ngut ki Nongmihkhmat paidbah la pdiang burom da u National President ka NPP bad Myntri Rangbah ka Jylla Conrad K Sangma ha ka jingdonlang u National Vice President bah Prestone Tynsong u badei ruh u Symbud Myntri Rangbah, u President ka NPP-Meghalaya Dr. W. R Kharlukhi, ki MDC ba kynthup u bah Fantin Lakadong bad u bah Bajop Pyngrope lem bad kiwei ki nongkitkam ka NPP.
Haba kren ha kane ka sngi u Conrad K Sangma u la ong ba kane ka jingwan iasoh jong 2 ngut ki MLA bad uwei u MDC kan dei ka sngi sah jingkynmaw iaka NPP bad bad iaka jylla Meghalaya baroh kawei namar kane kan dei ka dak ba ka party kan jop bha bad kan thaw sorkar marwei hadien ka ilekshon 2023.
U Conrad u la ong ba ka naduh ka por ba kine ki 2 ngut ki MLA ki don ha ka Liangpyrshah u ju peit iaki khamtam haba ki kren hapoh ka ing dorbar namar ki long shisha kita ki nongmihkhmat ba kynsai ba ka party ka kwah ba kin wan iasoh sha ka NPP.
“Daka jingiatreilang jong baroh, ka NPP kala thikna ba kan wan haka bor marwei hadien ka ilekshon 2023 bad ka party kan thaw History daka ba jop bun tam ki MLA mynta ka kynti” la ong u Conrad.
U Conrad u la kam ba kane ka jingwan iasoh ki MLA ba kynsai sha ka NPP kadei namar ba ka sorkar MDA haka jingialam ka party kala leh shibun bad kala shim ruh iaki sienjam ba wanrah iaka jingmyntoi iaki paidbah bad ka jylla baroh kawei.
U la ong ba ka ka sorkar bad ka jylla Meghalaya baroh kawei kala mad shi bun ki jingeh hapoh kine 5 snem hynrei kam shym la kynran dien ban leh iaka ba donkam namar kadei ka kamram jong kano kano ka sorkar ban pynlait iaki paidbah na ki jingeh baroh.
“Ka bha ka miat jong ki paidbah kadei ka thong ba hakhmat eh jong ka NPP bad dei namar kane donkam ban sngap bad iatreilang bad ki paidbah naka bynta ban pynurlong iaki jingdawa baroh” la bynrap u Conrad.
