Shillong, Nohprah 18 : U Myntri Rangbah Duh ka Ri u Narendra Modi hynne ka sngi u Blei ula plie iaka campus ba thymmai jong ka Indian Institute of Management Shillong (IIM Shillong) kaba don ha Umsawli.
Ia ka IIM Shillong la sdang da ka Ministry of HRD ia kaba la tip mynta kum ka Ministry of Education, kum ka IIM kaba 7 haka ri bad kala lah ban ai jingshakri mynta la bun snem ha kaban kyntiew iaka thain shatei Lammihngi.
Katei ka jingtei kaba thymmai jong ka IIM kan long ka jingplie lad na ka bynta ban pynlong ia ki prokram ai jinghikai kiba kyrpang ia ki samla ka ri India bad wat iaki samla na kiwei pat ki ri.
Ka IIM Shillong’s Knowledge Centre ka dei ka jaka pule kaba thymmai bad kan long kawei na ki jaka pule kaba don ia ki ‘Fully-Automated Library’ hapoh ka ri India, ha kaba kan don palat 40 tylli ki Database na ka bynta ki samla pule, ki scholar bad ki nonghikai kum ki E-resources.
Kan ai jingmyntoi ruh iaki samla pule, ki nonghikai bad ki nongthaw aiñ bad ki heh ophisar bad ban don ia palat 17,000 tylli ki E-journals bad ha kane ka jaka pule kan don ruh ka Internet kaba khlain bha lyngba u Optical Fibre bad kan don ruh ia ki jaka ialehkai football, cricket bad basketball.
U Myntri Rangbahduh ka ri haba ai jingkren ula pynpaw ba ki “Professional Institutions kum ka IIM Shillong kan ai jingmyntoi ia ka thaiñ shatei lam mihngi jong ka ri bad ka jingdon kane ka jaka pule kan thaw ia ki lynti bad kan long ruh kum ka lad ban aikam aijam.
U Shishir Kumar Bajoria, u Chairman Board of Governors, IIM Shillong, ula ong, ka long ka sngi kaban sah jingkynmaw iaka IIM Shillong ha kaba u Myntri Rangbahduh ka ri ula plie ia katei ka Campus kaba thymmai kaba don ha ka jaka kaba 120 akar. Namar ba ka pule puthi bad ka mei mariang ki ia iaid ryngkat lang, kumta yn tip ia kane ka jaka pule kum ka ‘campus in the cloud’ namar ka don ha ka jingthmu jong ka mei mariang bad ka tyrwa ba nai iaka jingnang jingstad kaba paka.
Katba u Prof. DP Goyal, Director, IIM Shillong, ula ai khublei ia u Myntri Rangbahduh ka ri u Narendra Modi uba la wan plie ia katei ka jaka pule bad ula pynpaw iaka jingsngewnguh ia u Modi uba la kren shaphang ka IIM Shillong bad kumno ka lah ban kyntiew iaka roi ka par haka thaiñ shatei lammihngi bad kane ka long kum ka jingai mynsiem ban iai trei shitom shuh shuh.
Ka IIM Shillong kadei ka jaka kaba saindur iaka pyrkhat pyrdain kaba shakri iaka thaiñ shatei lam mihngi jong ka ri bad ka long ruh ka skul kaba iadei bad ka khaïï pateng bad kane ka jaka pule kaba dang shu dep tei thymmai kan iarap ruh ia ki samla pule ba kin ioh ban pule, ban leh iaki kam wad bniah, ban trei shitom na ka bynta ka bha ka miat jong ka thaiñ shatei lam mihngi bad ka thong kaba ka don kadei ruh kaba u Myntri Rnagbahduh ka ri u buh eh hakhmat.
La seng iaka IIM Shillong ha u 2007 bad la sdang iaka jingai jinghikai ia ki samla ha ka 4 tarik u Naitung 2008 da ka jingthmu ban ai iaka jinghikai kaba pura bad kaba paka tam ha ka ri.
Ha u snem 2008 kila don 63 ngut ki samla kiba la pule haka kyrdan Post-Graduate Programme (PGP) bad mynta ka IIM Shillong kala nang roi, ha kaba mynta ki don 309 ngut ki samla kiba ioh jinghikai bad kane ka Institute kala pynmih ruh haduh 2,500 ngut ki Graduates kiba mynta ki trei ha ki kompani kiba pawnam ha kylleng ki ri.
Ki samla pule ka IIM Shillong kila ioh ruh iaka jingjop haka L’oreal Brandstorm, Wipro Earthian, Tata Steel-a-Thon, CFA Ethics Challenge, PwC Challenge, Google Case Challenge, Titan Elevate bad ia ka Aditya Birla Scholarships.
