Nongpoh, Nohprah 18: U wei u rangbah briew u la duh noh ia la ka jingim na ka jingpluh ding, kaba la jia ha ka Iingtrep ba u sah, kaba don ha kawei ka khlaw rep kaba hap ha ka shnong Sohlait Thymmai, marjan bad ka shnong Mawtnum, Ri Bhoi District.
Katkum ka jingtip ba la iohlum, la suba ba kane ka jingjia ka la jia hynne ka step phyrngap ha ka por ba u ne u rangbah u ba la tip kyrteng kum u Braveman Tangsang, u dang iohthiah lyngngai ha ka jingkynoi jong ka miet.
U Bah Ale Khongjoh, Kpa jong u ne u rangbah ba la khlad noh, u la pyntip, ba ki dei kiba shong basah na ki shnong War, hynrei ki la wan sah wai ha ka shnong Mawpdang, Ri Bhoi District namar ba ki la wan rep ha Ri Bhoi District.
U la iathuh ruh, ba u khun jong u, u la leit sha la ka bri ban leit rep bad u la dei ban wanphai noh mynta ka sngi U Blei, hynrei namar ba um shem la wanphai shuh, ha ka por 3 baje eiei nohphai sngi ki la pyrshang ban phone ia u hynrei ka mobile ka switch off bad kumta ki bahaiing ki la leit wad ia u sha katei ka bri bad hamar ba poi ki la lap syndon ba u ne u rangbah u la khlad hashen namar ka jingpluh ding kaba la bamduh ia ka iingtrep kaba u la sah.
Haduh ba thoh ia kane ka khubor, na ka liang ki bor pulit ne ki bor shnong ka Sohlait Thymmai kim shem la poi satia sha kane ka jaka hynrei tang katto katne ngut ki nongkitkam na ka shnong Mawtnum ki la leit ban synran ia ki bahaiing hasem sha katei ka jaka.
