Guwahati, Nohprah 16: Ha kawei na ka jingjia kaba sngewtriem, sawngut ki briew kaba kynthup ia i khunlung iba dang 17 bnai kila duh ei la ka jingim na ka jingshah thombor ha ka kynhun ki hati khlaw, katba uwei pat u briew ula ngat ha ka jingmynsaw ha ki artylli ki jingjia hapoh Goalpara district ka Assam hynnin ka sngi Palei.
Katkum ki khubor, la iathuh ba ha katei ka jingjia kaba nyngkong ka kynhun ki hati khlaw kila thombor naphang ia ki kali kiba iaid lyngba ka surok highway 12 hapoh Lakhipur bad pyniap ia laingut ki briew kaba kynthup ia itei i khunlung.
Ia kine ki lanot la tip kyrteng kum u Zaibar Ali, Ramani Rabha bad i khun kynthei ba dang 17 bnai jong u Rabha i Jenisa.Kawei pat ka longkmie kaba dei ka kurim jong u Rabha ka la ngat ha ka jingmynsaw ha kane ka jingjia.
“Kine ki hati kiba la wan na ki bynta khappud ka Meghalaya bad pynkhihwin ha Goalpara naduh kine ki khyndiat sngi ba la dep. Ngi la kyrpad ia ka tnat Forest ba kan beh noh ia kine ki hati na Goalpara hynrei ki la pulom ban shim ia ki sienjam bad mynta sawngut ki briew kila shah pyniap ha kane ka kynhun ki hati,”Ong uwei na ki nongshong shnong na Goalpara.
Nalor kata ula ong, “Ngi la kyntu ia i Myntri Rangbah (CM) ka jylla u Himanta Biswa Sarma ba un tuklar lem ha kaba iadei bad katei ka bynta bad ban shim ia ki sienjam khnang ban lah ban khanglad ia ka jingiatyngkhuh hapdeng ki briew bad ki hati.”
Na ka liang u Deputy Commissioner ka Goalpara u Khanindra Choudhury ula ong, “Ka kynhun ki hati khlaw kila jam lyngba ia ka surok hadien ba artylli ki kali rit lem ba ki kali kiba iaid da ka bording ilektrik kiba kit ia ki nongleit nongwan ki dang iaid lyngba hadien ba ka kynhun ki hati khlaw kila thombor ia kine ki kali.” Kane ka jingjia kala jia ha ka por kumba 1:30 mynsngi hapoh ka shnong Sigri.Kine ki hati kila wan poi sha kane ka jaka naduh kumba ar bnai ei ei bad pyndonkam ia kane ka surok ha kaba jam sha shiliang na ka bynta ban wad bam.Katba kiba bun ki kali ki ju ieng katba ki hati ki dang jam lyngba ka shiliang, hynrei ki artylli ki kali kim shym la leh kumta bad kaba la wanlam ia katei ka jingjjia ba sngewsih.”
Ha katei kawei pat ka jingjia, uwei u nongtrei ka tnat forest ula shah pyniap noh na ka jingthombor ki hati khlaw hapoh Solmari ha kajuh ka district.Kane ka jingjia kala jia ha katei kajuh ka sngi ha ka por 6 baje janmet hadien ba une u lanot ia uba la tip kyrteng kum u Sahadeb Rai ula shah kyrdem ha ki hati khlaw.
Katkum ka jingioh jingkhein da ki bor sorkar ha kine ki shiphew snem ba la dep kila don haduh kumba 800 ngut ki briew kiba la shah pyniap na ka jingiatyngkhuh bad ki hati khlaw, katba ka jingiap sha ka liang jong ki hati kalong kumba 250 tylli.
Ha une u snem ba la dep haduh 70 tylli ki hati kila iap ha kane ka jylla.Katkum ka khubor sorkar 24 tylli ki hati kila iap na ki daw jong ka jingpang jingshitom, 3 na ka jingshah bat ha ka bording ilektrik, 3 kiba ngat bih, 4 na ka jingshah tynrah ha ki rel, 1 na ki jingmynsaw, 18 na ka jingshah pom pyrthat bad 17 na ki daw ki bym lah ban tip thikna.Ha kaba kum kane ka juh ka por kila don haduh 61 ngut ki briew kiba la shah pyniap ha ka kynhun ki hati.
