Mairang, Nohprah 15: U Deputy Commissioner ka Eastern West Khasi Hills District, Bah W.Nongsiej hynne ka sngi palei u la plie ïa ka Eastern West Khasi Hills District Aquafest ha phyllaw jong ka Tirot Sing Memorial Hall, Pyndengumiong Mairang, ha ka jingsynran lang ki ophisar jong ki tnad sorkar bapher bapher jong ka distrik, ki nongrep, ki dkhot Seng Treilang (SHG), ki nonghikai bad ki khynnah pule.
Haba kren ha kane ka Aquafest, kaba long ka rynsan pyni nam ïa ki dohkha bad kiwei pat ki mar ba la pynmih da ki tnat sorkar bapher bapher bad ki Seng Treilang (SHG), u Deputy Commissioner u la ai khublei ïa ka tnat Fishery jong ka jylla ba kala lah ban pynlong ïa kane ka prokram.
U la ong ba kane ka prokram ka long kaba biang bha na ka bynta ki nongshong shnong namar ka long ka rynsan ban ioh ïaphylliew jingmut bad ki nongtrei sorkar halor ki skhim bad ki prokram jong ka Tnad bad ka ai lad ruh ïa ki nongrep bad ki Seng Treilang ka thaiñ, ba kin pyni nam bad ruh ban die ïa ki mar kiba ki pynmih.
U Bah Nongsiej u la ong ruh ba ka jingthmu jong kane ka prokram ka long ban pynshlur ïa ki paidbah nongrep bad ki nong seng kam lajong kiba don hapoh ka distrik. U la kyntu ïa ki paidbah kiba la wan sakhi ïa kane ka prokram ba kin applai ia ki skhim bapher bapher ïa kiba la pyntreikam lyngba ka tnad ri dohkha jong ka sorkar jylla.
Ha kane ka sngi, la pyni nam bad die paidbah ïa ki mar bapher bapher ba la pynmih da ki tnad sorkar kynthup ka tnat Fishery, Agriculture, Veterinary & Animal Husbandry, Commerce and Industries bad kiwei bad ruh ïa ki mar ba la pynmih da ki nongrep bad ki Seng Treilang ka thaiñ.
Nalor kane, la sam ruh ïa ki jaka ri dohkha (Aquarium) bad ki dohkha bun rong (ornamental fishes), na ka bynta ban buh kai sha ki saw tylli ki kolej ka distrik ba kynthup ia ka Tirot Sing Memorial College, ka Khatsawphra College, ka Mairang Presbyterian Science College bad ka Mawkyllei College.
