Leit ujor ka KSU sha u DC ba pynibor ki Pulit Assam
Nongpoh, Nohprah 15: Ka Khasi Students Union (KSU)-North Khasi Hills hynne ka sngi palei, kala leit buh da ka jingujor ha u Deputy Commissioner ka Ri-Bhoi District, kaba long pyrshah ia ka jingkynnoh kyntur pud jubor jong ka Tnad Forest ka Assam ha Umsaw Lumdorbar bad ka jingthwet ki Pulit ka Assam ia ki Nongialam Shnong haba ong “Ngim kwah ba ki paidbah ka Umsaw Lumdorbar kin mad ia kajuh ka apot kumba jia ha Mukroh”.
Ka KSU-NKH hapoh ka jingialam u President Bah Ferdinald Kharkamni kala mudui pyrshah ia ka jingker sainar jubor jong ka Tnad Forest ka Assam ha kane ka Shnong Khappud bad dawa ia ki bor District ka Ri-Bhoi ba kin shimkhia mardor ia kane ka kam.
Ka KSU-NKH kala dawa ruh ia ka bor District ba ka dei ban pynsangeh mardor ia ka jingshah thwet ki Nongialam Shnong ka Umsaw Lumdorbar ha ki Pulit ka Assam.
Haba iakren bad ki nongthoh khubor, u Bah Ferdynald ula pynpaw ia ka jingsngewkhia ia ka jingleh mynthi jong ki bor District bad ka Sorkar Jylla halor ka jingjia ha Umsaw Lumdorbar kaba la jia la jan artatiew eiei. Ula ong ba kane ka jing kheinsting ki bor Sorkar ka Jylla kala buh hapdeng ka jingshongsyier ia ki paradoh parasnam kiba shong shnong ha katei ka shnong khappud.
Kat kum ka jingong jong u, ka Seng ha ka jingleit tohkit ia ka jingjia ha kane ka shnong Khappud kaba hap hapoh ka Raid Nongtung,kala lap ba ki bor ka Assam lyngba ka Tnad Forest kila kam jubor ia ki jaka rep jaka riang jong ki paidbah kane ka shnong.
“Ka Tnad Forest ka Assam kala ker syndon da ki sainar ha ki jaka jong ki paidbah wat hapdeng ka jingpyrshah jong ki nongshongshnong kiba la leit buh ruh da ka jingujor ha Mawlaisnai Police Outpost bad ka jingtuklar u Border Magistrate ka Ri-Bhoi District” ula ong haba bynrap “Dei namar kane ba ki paidbah da ka jingbitar, kila leit ban pynpra ia kine ki jingker sainar jong ka Assam”.
Une u Nongialam ka KSU ula ong ba ka jaka ba ker sainar ka Assam ka dei ka jaka rep ki paidbah bala bun bun snem lait noh tang ha u snem 2005 ba ka Tnad Forest ka Assam kala leit thang ia ki 32 tylli ki shnong Khasi kiba don ha ka thain.
“Kane kala jingjia ha ka 6 tarik u Jylliew 2005 hynrei hadien ka jingiakren iasngewthuh jingmut, la aiti biang ia kane ka jaka ki paidbah Khasi ba kin rep kin riang tad haduh kane ka jingwan pynibor biang mynta”, ula ong.
U Bah Ferdynald ula pyntip ba ka Tnad Forest ka Assam lem bad ki Pulit ka Assam kila leit ruh wat sha Mawlaisnai Police Outpost ban phah kem naphang ia ki Nongshongshnong ka Umsaw Lumdorbar, kaba la pynshongsyier shikatdei eh ia ka shnong ka thaw baroh kawei.
Ka KSU-NKH ka dawa ia u Deputy Commissioner ban thung ia ka jingtohkit halor ka jingjia ha Umsaw Lumdorbar bad ban iakren ruh bad ki bor ka Sorkar Jylla ban pynbeit noh ia ki huri hura khnang ba ki paidbah ka thain Block-II kin ioh ia ka jingshongsuk shongshngain ioh lap ba jia biang kum ka jingjia ba sngewsih ha Mukroh, West Jaintia Hills.
