Nongpoh, Nohprah 15: “Ym nym don mano mano ruh kiba lah ban thaw ia la ka lawei khlem da don ia kata ka jingnang ka jingstad ha la ka jingim, kaba long kaba donkam eh ha kane ka juk kaba mynta na ka bynta ban saindur ia ka iing ka sem ne wat ia ka jaidbynriew”, ong ka Kong Paidolyne L Nonglait, District School & Education Officer ka Ri Bhoi District.
Kane ka Ophisar kala kren ia kine ki kyntien haba leit plie ia ka iing skul thymmai jong ka Saiden RMSA Secondary School ha ka shnong Saiden.
“Kane ka juk mynta ka la kham shai bha ha kaba bun hi na ki nongshong shnong jong ka distrik ne ka jylla ki sngewthuh shai ia ka jingkordor jong ka jingnang jingstad, kumta katba nang bun ki iing skul ha ki shnong ki thaw katta ka nang bha shaba palat bad kan wanrah ia ka jingkyrkhu na ka bynta kito ki khynnah skul ki bym pat ioh ia ka lad ban leit skul khamtam eh sha ki shnong kiba don sha nongkyndong” kala ong.
I Kong I Kharpran, Headmisstress ka Saiden RMSA Secondary School, ka la batai halor ka jingiaid lynti jong kane ka iingskul ban phrang jingnang jingstad sha ki khynnah pule ka them Ri Bhoi District. Kala pyntip ba ia kane ka skul la seng ha ka 15 tarik Rymphang 2017 hadien ba la kyntiew kyrdan na ka Saiden Government UP School.
Ia kane ka Iingskul la plie paidbah ha ka jingiadonlang u Bah Bipul Thangkhiew, President ka RBYF kum u symbut kongsan, u Bah Sunshine Makri kum u kongsan ba kyrpang, u Bah SF Lyngdoh, Rangbah Shnong, u Bah EK Lapang, dkhot ka SMDC bad kiwei kiwei ki dkhot ka SMDC bad ki khynnah skul.
