Nongstoiñ, Nohprah 14: “Ka kamram jong ki doctor, ki nurse bad baroh ki nongtrei jong ka Tnad ka koit ka khiah ka dei ka kam Blei, ha kaba ka kamram ka long ban shakri ïa ki briew, khamtam ïa kiba pang ba shitom bad kiba donkam shisha ïa ka jingïarap”, ong u bah Macmillan Byrsat Chairman ka Meghalaya State Law Commission bad MLA ka Nongstoiñ Constituency.
Une u MLA ula kren ia kane ha ka jingialang plie ia ka Mawlangkhar Sub Centre hynne ka sngi Balang ha ka jing ïa don ryngkat u Deputy Commissioner, ki Sordar shnong, bad ki nongshong shnong jong ki 10 tylli ki shnong kiba hap hapoh kane ka Sub Center ha Mawlangkhar.
U la ong ba kane ka Sub Centre kan ai ka jingshakri ïa kiba pang ba shitom na ki 10 tylli ki shnong kiba hap hapoh ka West Khasi Hills District. U la kyntu ban shim ïa ki kabu bad baroh ki jingmyntoi da ka jingdon jong kane ka Sub Center, ban ïoh ïa baroh ki jingsumar na ka bynta ka koit ka khiah.
U MLA ula pynshlur ruh ia ki Longkmie ba armet ba kin leit kha ïa ki khunlung ha ki jaka sumar, khnang ba kin ïoh ïa ka jingsumar kaba paka bad ba lait na kino kino ki jingma. U la pynkut ïa ka jingkren da kaba ong ban kiar ïa ka jing armet khynnah.
Hadien kane, u kongsan bad kiwei kiwei ki heh ki haiñ ki la pynlong ruh ïa ka jingjurip ïa ka Sub-Centre kaba don ïa ka OPD, Immunization, Labour Room bad Post Natal.
Kiwei kiba la ai jingkren ki long u Deputy Commissioner bah Garod L.S.N Dykes IAS Dr. S.A. Lyngdoh DMHO kaba la pynïaid ïa ka jingïalang, u Dr W.Sutnga bad kiwei kiwei.
