Shillong, Nohprah 09 : U Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong hynne ka sngi thohdieng, ula plie ia ka Ophis jong u Executive Engineer (EE) ka PWD (Roads),Mawphlang Division ha Mawphlang.
Haba kren ha ka jingialang, u Bah Prestone ula ong ba ka jingplie ia ka Mawphlang Division ka dei ka jingpynurlong ia ka jingphohsniew bala slem bha jong ki paidbah ka thain. Ula pyntip ba ka Division kam dei satia ka jingkyntiew kyrdan ia ka Sub Division bala treikam hynrei ka jingpynkha ia ka Division ba thymmai bad ka Sub Division kan nang iai trei kumba ju long.
Ula pyntip ba ka Sorkar hadien ka jingiatai kaba bniah bha, kala rai ban pynkha ia 4 tylli ki PWD Division ba thymmai bad kine ki dei ka Dadenggre, Kharkutta, Mawshynrut bad ka Mawphlang.
U Bah Prestone ula pyntip ba ia ka PWD Shillong South Division yn sa pynkynriah noh sha Pynursla khnang ba kan tehlakam ia ka jingdheng kali ha Shillong haba pynpaw ruh ba ka jingpynkynriah ia ki Ophis ka Sorkar sha kylleng ki jaka ka Jylla ka dei kaba dang pynkhreh shaid shaid.
Ha kane ka jingialang la iadonlang u MLA Bah Eugeneson Lyngdoh, MLA Samlin Malngiang, MDC Bah Lamphrang Bloak, MDC Bah Sherbor Mawlong, Chief Engineer ka PWD (Roads) KK Mawa bad kiwei kiwei.
