Nongpoh, Naiweing 8: Ka Iatreilang Village Organisation jong ka Shnong Nongdewsaw kaba hap hapoh ka NRLM Umsning C&RD Block, hynne ka sngi ka la ioh ban ot ia u cake kum ka dak ka jingrakhe iaka jingkynjoh jong ka VO sha u Maw-mer uba nyngkong haka lynti iaid kum ki kynhun jong ki longkmie ban shakri sha ka Imlang ka Sahlang.
Kum ban shu kdew hangne, la seng iaka Iatreilang Village Organisation ha ka 8 tarik u Nohprah jong u snem 2021 bad haduh mynta kane ka VO ka kdup lang iaki 5 tylli ki SHG ha ryngkat bad ki 3 SHGs kiba kham kyrpang ki ba kynthup ia 2 tylli ki SHGs jong ki Tymmen kiba ka kot sha ka 60 snem bad kawei ka SHG jong ki briew kiba don iaka jingduna haki dkhot met.
Ka Iatreilang VO ka la noh synniang shibun ki kam ha ka imlang ka sahlang, kiba kynthup naduh ka jingpynkhuid iaka shnong ka thaw, ka jingsam shana ICDS bad kiwei kiwei.
Ha kane ka sngi rakhe la wan ban iadon bynta lang da u Bah Jayson S Mawlong MLA ka Umsning, Macdalyne S Malong MDC Umsning, BDO Jong ka Umsning C&rD Block u bah Raja Brahma, bah AB Warjri rangbah shnong ka Nongdewsaw, ka kong Sonia Lapang President ka Iatreilang VO, ki dkhot jong ka VO bad SHGs, ki dkhot bad ki khun samlajong ka Shnong Nongdewsaw.
Haba kren ha ka jingialang ka kong Macdalyne S Mawlong ka la ong ba kum ki longkmie ka kamram kadei ha dpei ïing, ban peit iaka ïing ka sem bad iaki khun ki kti, hynrei kaba sngewtynnad ka long ban iohi ba ki longkmie mynta lyngba ka jingia snohkti lang bad ki kynhun SHG ki la lah ban ia don bynta lang ha ka ban bah lem ia ka kam hapoh ka imlang ka sahlang bad lyngba ki jinghikai ba ki ioh na ka sorkar, ka la pynlah lem iaki longkmie ban ïeng ha ki rynsan bapher bapher.
U Bah Jayson S Mawlong u ba long ruh kum u kongsan ha katei ka sngi u la pynpaw iaka jingkmen ban ioh ia don bynta bad ka Iatreilang Village organisation jong ka Nongdewsaw. Ha katei ka sngi kum u nongmihkhmat u la ong ka ba nyngkong eh ia u ka long ban sngewthuh iaka jingdonkam kaba ha khmat eh jong ki paidbah, u la ong ruh ba ha kane ka shnong dang bun ki jingdonkam ba kane ka shnong ka donkam.
U la ai mynsiem ruh ia ki Longkmie ki ba dei ki dkhot jong ki SHGs ba kin mih shakhmat ban trei na ka bynta ka imlang ka sahlang bad ban long ki ba ia tylli hapoh ka Kynhun lane hapoh ka shnong. Shuh shuh U la ban ruh da kaba ong ka jingnoh synniang jong ki longkmie hapoh ka imlang ka sahlang ka long kaba donkam bad ka jinglong shlur jong ki longkmie ban wanna shakhmat shisien ka sngi kan sa wan rah ia u soh u ba thiang.
Ha katei ka sngi na ka liang I Secretary jong ka Iatreilang Village Organisation Nongdewsaw i la ioh ban batai iaka jingiaid lynti jong ka VO mynta la shi snem ha kaba i la ioh ban batai iaki katto katne ki kam ba ka VO ka la leh, bad ha ka juh kapor ki la ioh ruh ban ai iaka memorandum sha u BDO ka Umsning C&RD block ha kaba iadei ban pynioh iaka building ophis treikam jong ka VO.
