Shillong, Nohprah 08 : Ka skul Ammutong Govt LP kaba hap hapoh ka Amlarem Civil Sub-Division kan sa ioh ia ka Iingskul ba thymmai ban tei ha ka jingmang pisa ba T. 44 lak tam ha ka jingrakhe ia ka jingdap 70 snem jong ka skul.
Ia kane ka Iingskul ba thymmai la buh mawnongrim hynne ka sngi palei da u Myntri ka Tnad Pule Puthi bad MLA ka thain ma Lahkmen Rymbui.
Ka skul Ammutong Govt. LP ka dei kaba la seng naduh u snem 1947 da ki riew rangbah jong ka shnong Ammutong kum ka skul Missionary bad kala ioh ruh ia ka jingithuh da ka JHADC.
Haba kren ha ka jingialang, u Myntri ula ong ba ka hok jong ki paidbah ka dei kaba bun hynrei ka shong ha ki nongmihkhmat jong ki ban pynioh ia ki sha ki paidbah.
Haba phai sha ki jaka pule ha thain Amlarem, ula ong ba kila don bun tylli ki skul Lower Primary, Upper Primary bad Secondary bad da ka jingbiang ki Nonghikai,kam don daw satia ki khynnah kin pep skul shiteng por.
Une u MLA ula kyntu ia ki paidbah ba kin shim ia ki jingmyntoi ba ioh na ka Sorkar ba kynthup ia ka iohkam iohjam, ka kam rep bad kiwei kiwei.
Kiwei pat kiba la kren ki kynthup ia u Waheh Chnong Bah Lamphrang Shylla, u SDSEO Bah Sowan Pyrtuh bad kiwei kiwei.
