Shillong Nohprah 08: Ka Meghalaya IAS Officers’ Association kala shong jingialang hynnin ka 7 tarik u Nohprah bad da kawei ka sur kala pynrem jur iaka jingkynnoh u Saket Gokhale ba don ka jingpyndonkam bakla ia ka pisa haka jingpyntreikam iaka Meghalaya Eco Tourism Infrasture Development Project (MEIDP).
Katkum ka kyrwoh na u President u Dr. P. Shakil Ahammed bad u Secretary u Bah C.V.D. Diengdoh kila pynpaw baki jingkynnoh jong une u nongialam ka AITC ki long kiba bakla bad ki bym don nongrim bad ka dei kaba la leh da ka jingthmu ban ialam bakla ia u paidbah.
Kila ong baka Meghalayan Age Limited kala dep pynmih iaka jingpynshai haki khubor, ha kaba kala kren shai bad pynpaw ba ki jingkynnoh jong u Gokhale ki long kiba bakla.
Ka Meghalaya IAS Officers’ Association ka ai ka jingkyrshan ia u Dr. Vijay Kumar D, Commissioner and Secretary ka tnad Planning uba long ruh u CMD ka Meghalayan Age Limited bad baroh ki heh sorkar ba dei peit, kiba sha niew kyrteng ha u Gokhale.
“Ka seng ka kwah ban pynkynmaw ba ka kam jong uno uno u shakri sorkar ka long ban trei na ka bynta ka jingthmu bad ki mat ka roi ka par jong ka sorkar ba la jied da u paidbah, katkum ka jingbthah ka Riti Synshar Ri ka India bad ka kyndon ain jong kata ka jaka” kala ong.
“Kino kino ki jingthmu ban kynnoh khlem nongrim pyrshah iaki shakri sorkar ba kynthup ia ki heh IAS bad ban pynmih iaka kyrteng jong ki da ka jingthmu ban iohnong ha ka kam sain pyrthei, ka dei ka bym ai jingmyntoi iaki paidbah bad ka dei ia ka ban pynrem jur” la pynpaw ki Ophisar IAS.
Ka Association ka ong “Kumba la pynshai da u Dr. Vijay Kumar, ka jingtreikam ka long katkum ka lynti jong ka ain ba kynthup ia ka jingkhot ban thep ia ki tender bad ka jingioh jingbit shwa na ka New Development Bank (NDB) kaba dei ka nongbei tyngka iaki project haba pyntreikam iaka Meghalaya Eco Tourism Infrastructure Development Project. Kane ka project ka thmu ban kyntiew iaka kam jngohkai pyrthei, kaba dei ka tnad ba kongsan na ka bynta ka roi ka par ha ka jylla bad kum kine ki jingkynnoh ba lamler ki pynthohbria iaka jylla”.
