Shillong Nohprah 03: Ka seng JSU hynne ka sngi saitjain kala iakynduh ia u Myntri Rangbah ka jylla u Conrad K Sangma ha Jowai ban buddien iaki jingdawa ba ka sorkar kam dei ban buh Border Out Post hapoh ki shnong hapoh thaw hynrei kadei ban buh ha u Zero Line jong ka khappud.
U General Secretary ka JSU u samla T Suchen ula pyntip ba ka seng ka dawa na ka sorkar ban leh daka Joint Inspection bad ban kynthup lang iaka JHADC bad ki nongialam nongshong ka shnong Mukroh ban tipbha ia u pud u sam ban ioh buh iaka BOP ha Zero Line na ka bynta ban ai jingiada ba paka ia u nongshong shnong bad ban lait na jingshah knieh jaka bad shah pyndik ha ka jylla Assam.
Ula pynpaw ba ka seng ka dawa ruh ban pynkup bor iaki pulit ka jylla kiba pahara ha ki khappud ban pynphai kylla lada don kano kano ka jingsiat na ki pulit Assam kum shi bynta ban iada ia u paidbah ka thaiñ ka shnong khappud.
Ka JSU ka dawa ruh ban pynphai iaki 36 tylli ki shnong Khasi Jaintia na Block 1 sha Meghalaya.
U nongialam ka JSU ula pynpaw ruh ba ka seng ka pyrshah jur iaka jingkren pynshit u CEM ka Karbi Anglong Autonomous Coucil bad iaka jingthmu jongki Karbi ban buh mot sah jingkynmaw ha u pud u sam ka shnong Mukroh ia u Forest Guard ka Assam u ba kyllon iap ha ki kuli jong ki pukit Assam ha Mukroh.
Ka seng dawa na ka sorkar jylla ba kam dei ban ailad iaka jingthmu u CEM ka KAAC namar kane kan sa wanrah iaka jingumsnam lane ka jingsngew iapher hapdeng ki jaitbynriew Hynñiewtrep bad ki Karbi .
Ula iathuh ba na ka liang u Myntri Rangbah ka jylla ula kular ban leh iaka Joint Inspection bad ithuh ia u pud u sam ka shnong Mukroh bad ban ym ailad ban shna ia u mot sahnam jong u pulit Forest Guard ha Mukroh .
