Shillong, Nohprah 02: Ka Khasi Hills Autonomous District Council (KHADC) hynne ka sngi thohdieng, kala pynmih iaka hukum bala wengkam shipor (Suspend) ia u bah Bashemphang Thabah kum u Lyngdoh jong ka Sohiong Lyngdohship.
Ia kane la iathuh da u Chairman ka Joint Action Committee (JAC) Sohiong bah Purningstar Shabong hadien ba ki la wan kynduh ia u DeputySsecretary jong ka executive committee (EC) ka KHADC.
Haba kren sha ki lad pathai khubor u bah Purningstar Shabong ba kane ka jingshah wengkam shipor (Suspend) ia u Lyngdoh jong ka Sohiong Lyngdohship kadei namar ba kum u Lyngdoh um shym la lah ban trei iakam ba la bynshet ha u.
U bah Purningstar u la iathuh ba kane ka jingdawa weng ia u bah Bashemphang Thabah kum u Lyngdoh jong ka Sohiong Lyngdohship kadei ka jingdawa naduh u snem 2019 bad mynta ka sngi, lah ban ong ba kadei ka jingjop namar ka district council kala pynmih iaka hukum ka ba long ka jingjop iaki paidbah ka thain Sohiong.
“Ki don bun ki daw ba pynlong iaka JAC Sohiong ban dawa weng ia u bah Bashemphang Thabah kum u Lyngdoh jong ka Sohiong Lyngdohship bad kaba kongsam kadei namar ka jingbym trei hok iaka kam, namar bun ki rangbah shnong ki duh sanat bad ka jingbym lah jong u ban mang tyngka man u snem naka bynta ka jingdonkam hapoh ka thain” la kynnoh u bah Purningstar.
U bah Purning u la iathuh ruh ba katkum ka jingbthah, naka liang ka District Coiuncil kala pynmih iaka jingbthah ba ki Lyngdoh kidei ban thung ia u PIO hynrei une u Lyngdoh um shym la don satia u PIO.
U bah Purningstar u la iathuh ba ha ka juh ka por ka EC ka la thung ia u bah C Pohlong kum u Administrative Officer jong ka Sohiong Lyngdohship bad ka jingtreikam jong u bah C. Pohlong kum u Administrative Officer jong ka Sohiong Lyngdohship kan neh tad haduh ban ai hukum da kumwei pat.
