Mairang, Nohprah 2: Ka Ophis ka District Social Welfare Officer West Khasi Hills District, hynne ka sngi thohdieng, ka la pynlong ïa ka ‘International Day for Persons With Disability (PWDs)’, lane ka sngi ba kyrpang jong ki nongshong shnong kiba don jingduna ha ki dkhot met.
Ïa ka prokram jingrakhe, la pynlong ha Tirot Sing Memorial Hall, Pyndengumiong Mairang Eastern West Khasi Hills District, ha kaba u Deputy Commissioner jong ka Eastern West Khasi Hills District, u Bah W. Nongsiej u la long u kongsan ha ryngkat ka jingdon lang jong I District Social Welfare Officer ka West Khasi Hills District, I Kong V.C War, I Principal ka Mairang Vidya Jyoti Inclusive School, Mairang, I Kong B.L Mawnai, u Director ka Makarious Medical Centre Mairang, u Dr. M. Syiem bad kiwei kiwei.
Ha ka jingkren jong u kum u kongsan, u Deputy Commissioner u la ai khublei ïa ka ophis jong ka District Social Welfare Officer ka West Khasi Hills District, ba ka la lah ban pynlong ïa ka jingrakhe ïa kane ka sngi kaba kyrpang. U la kyntu ïa baroh kiba la sakhi lang ïa kane ka prokram, ba kin peit bad ithuh ïa ki nongshong shnong kiba don jingduna ha ki dkhot met, lyngba ki sap ba kyrpang jong ki ym lyngba ki jingduna kiba ki don.
U Director ka Makarious Medical Centre Mairang u Dr. M. Syiem, u la khot la wer ïa baroh ba kin don ïa ka mynsiem jong ka jingsngewlem na ka bynta ki nongshong shnong kiba don jingduna ha ki dkhot met. U la kyntu ruh ïa baroh ba kin wanrah ïa ka jingkylla ha ka saiñ pyrkhat, da kaba phai khmat sha ka jinglah jong kito kiba don jingduna ha ki dkhot met lyngba ki sap ki talent ba u Blei u la ai ha ki.
Ha kane ka sngi la pynlong ruh ïa ka medical check-up, ka jingpynrung kyrteng aadhar bad la ïoh ruh ban pynlong ïa ki jingïalehkai bapher bapher na ka bynta ki nongshong shnong ka thaiñ kiba don jingduna ha ki dkhot met.
Ha kane ka jingrakhe, ki kynrem ki lyndan ki la sam ïa ki tiar bad kor ïarap sha kiba don jingduna ha ki dkhot met kiba la wan ïashimbynta ha kane ka prokram.
