Mairang, Nohprah 1: Ka FKJGP Mawthadraishan Circle hynne ka sngi palei kala dawa ia ka Tnad Animal Husbandry & Veterinary ba kan bujli noh ia ka Doktor na Mawthadraishan Block namar ka jingeh ba ki paidbah ki iakynduh ha ka jingbym iasngewthuh ktien.
Ka FKJGP kala buh ia kane ka jingdawa hakhmat ka Animal Husbandry & Veterinary Officer, Nongstoin.
Kane ka Seng hapoh ka jingialam u Presdent Samla Firstbirn John Marngar kila pynpaw ruh ia ka jingeh halor ka jingbym biang ka rukom treikam jong ka Tnad ha Mawthadraishan Block bad pyntip ba bunsien ki paidbah kim ju ioh satia ia ki jingiarap haba ki leit wad na ka bynta ka jingri jingduk jong ki kynthup wat ia ki dawai.
Ka seng ka la pynpaw shai ba lada long kaba lah, kan bha ban wanrah bad thung hi da ki Doctor kiba lah ban kren bad sngewthuh ban iakren bad ki nongri jingri, khnang ba kan long kaba pynsuk ia ki lada ki donkam ha kano kano ka por bad lada ki ai ia ki kynja jingpynshai paidbah ruh kan pynsuk ia ki paidbah ban sngewthuh.
Ka seng kam kynthoh lane kheiñ jaitbynriew halor ka jingdawa ban weng noh ia kane ka Doctor tang namar ba ka dei ka Garo. Hynrei ka jingeh kan long sha ki paidbah namar ba kam lah ban iakren khasi bad sngewthuh khasi.
Na ka liang I officer incharge, I la iathuh ba na ka liang ka sorkar kam pat buh haduh mynta ia u Assistant Veterinary staff ban iarap ia I Doctor incharge hapoh ka Block haduh mynta.
Kumta na ka liang jong ka seng ki kyrpad jur ba ka sorkar kan shimkhia ban buh lane thung noh ia kita ki post ba dei ban don ki nongtrei, khnang ba kan pynsuk ia ki paitbah bad ki nongri jingri ka dong ka thain Mawthadraishan hi baroh kawei.
