Shillong, Naiwieng 28 :Ka Federation of Khasi Jaintia and Garo People (FKJGP) hynne ka sngi nyngkong, kala pynpaw iaka jingbynniaw ba ki samla ka jylla kiba aplai kam ha NEIGRIHMS ki hap ban leit leh eksam sha kiwei pat ki jylla bad kane kala buh haka jingeh kaba khraw iaki.
U Vice President ka FKJGP Bah Kitboklang Nongphlang ula ong, ka jingwan iakynduh ia u Myntri ka koit ka khiah kadei halor ka eksam Staff Nurse jong ka NEIGRIHMS bad ia kine kam ba lait la pynmih ha ki lad pathai khubor ha u snem 2019 hynrei namar ka khlam COVID-19 la pynsangeh noh ia ka bad mynta kala pynmih biang iaka jingpynbna paid bah na ka bynta ki kam kiba lait haduh 2000 tylli hapoh NEIGRIHMS.
“Kiba bun ki samla pule kiba aplai ia katei ka kam kila wan ud la wan nam haka seng namar ba ki hap ban leit leh iaka eksam ha Jaipur bad Assam bad kane kala buh haka jingeh ia ki samla pule khamtam ia ki kynthei namar kam long kaba shngaiñ ban leit haka jylla Assam khamtam hadien ki jingjia kiba mih ha Jylla ne ban leit thoh eksam shaduh sha Jaipur” ong u Bah Kitboklang Nongphlang.
Ula ong, ka seng kala pyrshang ban iakynduh ia u Director ka NEIGRIHMS hynrei kam shim la ioh ban iakynduh ia u kumta kila leit ban pynsngew noh ia katei ka jingeh ki samla pule ha u Myntri ka koit ka khiah ka jylla u James PK Sangma.
“Ka long kabasngewsih ba haka jingiathir bad u Myntri ka koit ka khiah, ka por kala slem palat namar katei ka eksam kan long ha kine ki khydniat sngi bad ka sorkar ruh kam lah ban leh eiei shuh. Kane ka eksam kadei ka All India Exam bad kane kadei ka jingduh kaba khraw ia ki samla ki jong ngi” ula ong.
“Jin ba kam don ka jingkhang iaka Internet ha ka taiew kaba la dep, bad lada dei ba kila wan pynsngew ia katei ka mat ha ka taiew bala dep, ka sorkar kala lah ban leh eiei, kata ban pynkynriah iaka tarik jong ka eksam ne ban buh iaka jaka ban thoh eksam hapoh ka jylla” ong u Vice President ka FKJGP.
Ula ong, ka sienjam kaba la shim da ka sorkar ban khang iaka Internet na ka por sha ka por man ba don ka jingiakhih paidbah ka long ka jing duhnong kaba khraw bad mynta ruh, ka jingduhnong ka long ba ia kitei ki kam kiba lait hapoh NEGRIHMS Hospital mano ban ioh, namar ba la khim palat ka por, ki don ki khynnah kiba la ioh iaka Admit Card katba don ruh ki bym pat ioh satia namar ka jingbym long jong ka Internet ha kine ki sngi.
“Ngi hap ban iatai bad iathir sani bha halor kane ka jingjia bad ka FKJGP ka iengskhem haka nongrim ba ka sorkar kadei ban don noh iaka State Employment Policy namar ka jingbym don katei ka polisi treikam ka wanrah iaka jingduhnong kaba khraw ia ki samla ka jylla” ula ong.
“Ngi dang khmih lynti ba ki samla trai kin iohkam iohjam hapoh NEIGRIHMS hynrei namar kitei ki jingjia, kan long pynban kum ka jingplie lad ia ki briew kiba nabar katba ki khyn nah ki jong ngi kin duh iaka lad ka lynti ha kum kane ka por kaba iaid daka juk Internet” ula bynrap.
Haba pynpaw ba ka jingkhang Internet ka sorkar naka por sha kapor kadei ka jingduhnong kaba khraw, une u Nongialam ula ong ba kane ka dei ka kam biej namar mynta kala kyrtoh kylla ia ki samla pule ka jylla.
“Ki don haduh 2000 tylli ki kam kiba lait bad ki don da ki phew hajar ngut ki samla kiba aplai ia katei ka kam ha NEIGRIHMS bad wat ki samla ka jylla kiba trei ha kiwei ki jylla ruh ki don iaka jingangnud ban wan trei noh hala ka jong ka jylla” la pynkut u Nongialam ka FKJGP.
