Nongstoiñ, Naiwieng 28: Ka Dorbar Shnong Mawkhlam Nongpyndeng ha ka Executive Dorbar kaba la shong kyrkieh dang shen, ka la sngewkhia jur ïa ka jingshim kabu jong ki briew kiba ym lah ban ithuh dur khmat, kiba pyrshang ban thang dusmon ïa ka jaka shna jingshna (Furniture Unit) jong uwei na ki nongshong shnong ka thaiñ da kaba shim kabu ïa ka jinglong jingman hapoh ka jylla.
Ka Dorbar Shnong ka maham tyngeh ba lada lap ïa ki briew kiba pyrshang ban pynpluh jubor ïa ka jingjia, da kaba pyrshang ban pynjot ïa ki jingdon jingem jong ki paidbah kiba longtrai da ki riew shimet, ki seng ki kynhun bad ki mar sorkar hapoh ka Shnong Mawkhlam Nongpyndeng, ka Dorbar Shnong kam banse ban pynshitom katkum ki aiñ Shnong.
Ka Dorbar Shnong ka kyntu ïa ki nongshong shnong ba kin sngewbha ban kiar na ki kam leh beaiñ.
Ha kajuh ka por, na ka liang ka Dorbar Shnong ka sngewkhia bad pynrem ïa ka jingjia ha ka Shnong Mukroh, kaba ki pulit Assam ki la dkhat jubor ïa ka jingim jong ki riew paidbah katei ka thaiñ. Ïa ka kam pynïap briew dei ban pynrem da baroh, namar ym don u ba lah ban shim ïa ka aiñ ha ka kti. Kane ka long katkum ka kyrwoh ba la phah da u Bah T.S.Byrsat Secretary, Dorbar Shnong Mawkhlam Nongpyndeng.
