Nongpoh, Naiwieng 28 : Ki Pulit ka Ri-Bhoi District kila pynkhlain mynta ia ka jingpeitngor ha surokbah National Highway ban pynthikna ia ka jingshngain jong ki paidbah nongleit nongwan hadien ka huri hura kaba mih na ka jingjia ha Mukroh.
Ki Pulit ka District ki dang bteng ban iaid pahara ha kane ka surok bah ban tehlakam ia ki riew shim kabu kiba kwah ban thaw ia ki jingkulmar.
Ka jingjia ha Mukroh kala pynshongsyier ia ki paidbah nongleit nongwan kaba la pynlong ruh ia ki Pulit Assam ban khang shisyndon ia ki kali kamai Tourist ban wan kiew sha Shillong. Wat ki kali kit umphniang kila pynsangeh ia ka jingpynpoi umphniang sha Meghalaya namar ka jingsheptieng ioh mih kano kano ka jingjia ba sngewsih.
U Superintendent of Police ka Ri-Bhoi District ula ong baka jinglong jingman ha Ri-Bhoi mynta kala jai jai hynrei watla katta, ki Pulit ka District kim shym la khein sting satia ha kaban iaid pahara khamtam ha surok bah NH-6 ban pynthikna ia ka jingshngain jong ki paidbah nongleit nongwan
Ula pyntip ba kane ka jingiaid pahara ka dang iai bteng naduh Jorabat shaduh ka Umiam kynthup sha ka surok Shillong By-Pass kaba hap hapoh u pud u sam ka Ri-Bhoi.
