Shillong, Naiwieng 25: Ka kynhun ki nongñiah kali kamai tourist hapoh ka lama jong ka Ïaitylli Tourist Taxi Owners & Drivers Association (ITTODA) hynne ka sngi kala kyntu iaka sorkar jylla ban weng ïa ka jingeh kaba ki nongñiah kali kamai kiba kynthup ïa kiba na ka jylla Assam ki ïakynduh.
Ha ba kren sha ki lad pathai u general secretary ka ITTODA u bah Balajied Jyrwa u la iathuh ba ki nongniah kali kamai na Shillong sha Guwahati ne Guwahati sha Shillong hapoh ka shatri ka ITTODA mynta ka sngi ki la shong jingialang bad ka seng ki nongniah kali na Guwahati ha kaba iadei bad ka jingshah pyrkhing ka rung ka mih na ne sha ka jylla Meghalaya ha ki pulit Assam.
U bah Balajied u la ong ba naka liang ki nongkamai kali kila shim iaka rai ba wat hapdeng ka jingdon ka jingpyrkhing ka rung ka mih hynrei ban pynsuk ia ki paidbah kiba sah kut sha ka jylla Assam ne Meghalaya, ki nongkamai kali ki la rai ban pynpoi ia kine ki nongleit nongwan ha Jorabat bad ba ki kali Assam ne Meghalaya kin kit ban pynpoi pat ia kine ki nongleit nongwan sha ka jaka ba ki thmu ban leit.
“Kum ki nongkamai kali na Shillong ne Guwahati, ngi buh ka jingkyrpad sha baroh artylli ki sorkar jylla ba kidei ban pynbeit noh mardor bad leh eiei ha kaba iadei bad kane ka jingiakulmar namar lada sangeh kamai, ka jingktah kan dei hi iaki paidbah jong baroh artylli ki jylla” la ong u bah Balajied.
U bah Balajied u la ong lada ka sorkar kam lah ban leh eiei halor kane, ka seng ka lah ban sangeh ïa ka jingshakri sha ki nongleit nongwan kiba na kylleng ki bynta jong ka ri, khamtam ïa ki nong jngohkai pyrthei.
U la pyntip ruh ba ha ka jingialang ki la rai ba ia ki nong Meghalaya ba sahkut ha Assam, ki kali Assam kin wan buh haduh Jorabad ne kiba na assam ba sahkut ha Meghalaya ki kali Meghalaya kin leit buh haduh Jorabad bad ba ki kali jong ki nong Mehhalaya ne Assam kin kit ban pynpoi pat ia kine ki nongleit nongwan sha ka jaka ba ki mut ban leit.
