Shillong, Naiwieng 24: Ki samla kiba la dep ban thoh ia ka eksamin wad kam pulit, kila leit ban pan jingbit na ka ophis Deputy Commissioner (DC) ka East Khasi Hills District ban iaid paidbah ha ka 30 tarik mynta u bnai na Madan Malki shaduh U Mot Kiang Nangbah.
Haba kren sha ki lad pathai khubor u samla Diben Lyngdoh bad u bah Shine Marwein ki la pyntip ba kila leit pan jingbit na ka DC ba kin iaid paidbah ha ka 30 tarik mynta u bnai ban dawa na ka sorkar ba kan pynlait noh ia ka resol wad kam pulit hynrei haduh mynta kim pat ioh satia iaka jubab.
U samla Diben Lyngdoh u la iathuh ba ka sorkar kala khot ia ka aplikashon thep kam pulit naduh u snem 2019, ka jingpynmareh la pynlong ha u Naiwieng 2021 bad ia ka eksamin la pynlong ha u bnai Rymphang 2022, hynrei haduh mynta ka sorkar kam pat pynmih ia ka resol.
“Ka jingkwah jong ngi ka long ba ka sorkar ka dei ban pynmih noh ia ka resol kaba kila dep ban thoh namar haduh mynta ka sorkar ka shu ai daw beit ba don ka Roster System ba sa slem pynmih iaka resol” la ong u samla Diben Lyngdoh.
U samla Diben Lyngdoh u la buh jingkylli iaka sorkar, balei ka sorkar kam lah ban pynmih ia ka resol mynta la jan shisnem namar kane ka jingslem pynmih resol ka buh ia ki samla kiba la dep ban thoh ia ka eksam ha ka jinglynga.
U la khot ia baroh kito kiba la thoh ia ka elsamin ba kin ia poi lang ha katei ka sngi ban iaid paidbah ban pyni iaka jingpyrshah iaka sorkar.
