Agartala, Naiwieng 24 :Kumba 12 ngut ki briew kila ngat ha ki jingmynsaw hadien ka jingiakynad hapdeng ki nongkyrshan jong ka CPIM bad ka BJP hapoh Khowai district ka Tripura mynta ka sngi.
Katba ki sngi sha ka ilekshon assembly kila nang jan, kiba kum kine ki jingiakynad sain hima ruh kila nang jur katba nang mih ki sngi.
Katei ka jingiakynad hapdeng ki nongkyrshan jong ka party CPIM bad ka BJP kala jia ha ki bynta jong ka Singichhra Beltali kaba hap hapoh Khowai district.
Ki tyllong khubor ki iathuh ba haduh kumba 12 ngut ki nongtrei ka BJP kila ngat ha ka jingmynsaw ha kane ka jingjia.Napdeng kine ia u Gopal Pal, Santosh Das, bad u Sanjay Nath Sharma la hap ban pynkynriash noh sha GB Pant hospital ha Agartala napoh Khowai District Hospital.
Nalor kata ki tyllong khubor ki iathuh ruh ba kane ka jingiakynad hapdeng ki nongkyrshan ka CPIM bad ka BJP kala wan jia ruh wat hapdeng ka jingsyrtap jong ki bor pahara kiba la shu kylla long ki nong peitkai.
Halor kane ka jingjia na ka liang u secretary ka AIKS uba dei ruh u dkhot jong ka CPIM state committee u Pabitra Kar ula kynnoh ba ka kynhun runar jong ka BJP kila pynlong kynsan ka jingthombor hapoh ka rally jong ka CPIM.
“Ha ka por ba ka rally kala sdang, ngi la ioh jingtip ba ki kynhun runar ka BJP kila ialum lang ha ryngkat ki tiar pynmynsaw ha ki bynta jong ka Singichhra.Kumta mardor na ka liang u MLA ka CPIM ha ka thain ula pyntip sha ki heh pulit.Ki pulit kila kyntu ia ngi ba ngin sdang noh ia kane ka jingiaid kham hadien.Kumta ruh hadien katto katne por hadien ba kane ka jingiaid paidbah kala sdang, kine ki runar ka BJP kila wan ban thombor ia ki nongiaid rally hakhmat ki pulit.Kane ka la pynlong ruh ia ki nongkyrshan jong ka CPIM ba kin pynphai kyllla.Hynrei, watla katta kumba 5 ne 6 ngut ki nongkyrshan jong ka party CPIM kila ngat ha ki jingmynsaw na ka jingshah thombor ha ki runar ka BJP,” ong u Pabitra Kar.
U Kar ula ong ruh ba uwei na kine ki nongkyrshan jong ka party ula don hapdeng ka jingmynsaw kaba jur ha kaba la pynkynriah noh ia u shapoh GB Pant Hospital ha Agartala.
Ha kawei pat ka bynta, na ka liang u president ka BJP Khowai Mandal u Subrata Majumder ula kynnoh ba ki nongkyrshan jong ka Yuva Morcha ki dang bunkam ha kaba iadei bad ka jingpynlong prokram ha ki bynta jong ka Singicherra hadien ba ki nong iaid rally jong ka CPIM hapoh ka jingialam jong u Kar, u Padma Kumar Debbarma, bad u MLA u Nirmal Biswas kila wan tur sha ki bynta jong ka Beltali na Durganagar lyngba ka Singicherra.
“Ki runar jong ka CPIM kynsan kila iaid lait na ki bor pahara ha ryngkat ki nar rod bad ki dieng ki maw kila thombor naphang ia ki nongkyrshan jong ka BJP.Kila don kumba 12 ngut ki nongtrei ka party jong ngi kiba la ngat ha ki jingmynsaw, bad ia laingut na ki la pynkynriah noh sha GB Pant hospital”, ula ong.
Ki tyllong khubor ki iathuh ba hadien ba ki nongkyrshan ka BJP kila pyrta pyrshah hakhmat ka rally jong ka CPIM, kumta ruh ka kynhun ki nongkyrshan jong ka CPIM kila pynlong ka jingthombor ia ki nongkyrshan ka BJP.
