Pyndait lama їong ki lai seng ha ki kali ka West Khasi Hills
Nongstoiñ, Naiwieng 23: Ki Sengbhalang bapher bapher ka West Khasi Hills hynne ka sngi Balang, kila dawa ia ka Sorkar Jylla ba ka dei ban pynkhlain noh ia ki bor pahara ha man ki shnong khappud bad ka Jylla Assam ban lah tehlakam ia ki jingthombor ki Pulit Assam, kiba nud ban dkhat jubor wat iaka jingim jong ki paidbah ba lui lui.
Kane ka jingdawa kala mih na ka seng FKJGP, KSU bad HNYF-West Khasi Hills kiba la pynlong ia ka Black Flag Day hynne kum ka dak ban pynpaw ia ka jingsngewsih halor ka jingshah siat iap ki 5 ngut ki riew paidbah ka Shnong Mukroh, West Jaintia Hills ha ki Pulit ka Assam hynnin ka step sngi Ba-ar.
Kat kum ka jingong jong ki Nongialam kine ki Seng, ka jingthombor bad jinghiar thma jong ki Pulit Assam ia ki paidbah ha Khappud kam dei satia kaba dang jia tang ha Mukroh bad pynkynmaw ia ka jingjia u snem 2010 ha Langpih ha kaba saw ngut ki riew rangbah ka thain, kila kyllon iap ha ki kuli jong ki Pulit Assam.
“Ta ka daw, ngi dawa ia ka Sorkar ba kan pynkhlain noh ia ki bor pahara ha man ki shnong Khappud ka Jylla bad jong ka Assam da kaba buh ia ki Police Outpost kiba khlain ban khang shisyndon ia ka jingpynibor ki Pulit Assam” kila ong.
Ki Nongialam bad ki Dkhot jong kine ki Seng hynne ka sngi kila pynlong ia ka jingiasieh lama iong ha kylleng ki jaka jong ka District kynthup naduh ki kali kamai bad kali shimet haduh ki Ophis sorkar.
Ki nongїalam ki la ong ba kaei kaba jia ha Mukroh ka dei ka jingjia kaba la pynsngewsih jur ym tang їa ki longїing jong kito kiba ngat ha katei ka apot sepsngi, hynrei ka pynsngewsih kthang ruh їa ki para doh para snam ha ka bri u Hynñiewtrep baroh kawei.
U bah Carry Oscar Kharmuti General Secretary ka FKJGP, u la ong ba ka jingkular jong ka sorkar Assam ban siew san lak tyngka sha ki longїing kiba ngat ha katei ka apot, ka pyni shai ba ka sorkar Assam kam kheiñ snep satia їa ki briew jong ka Meghalaya.
U la bynrap ruh ba lada їa ka jingim briew la pynshongdor tang san lak tyngka ka long kaei kaei ka bym sngewїahap. Kitei ki nongїalam jong ki sengbhalang ki la dawa ruh na ka sorkar ba ka dei ban phah shuh shuh ki bor pulit sha katei ka jaka ban їada їa ki paitbah.
