Aizawl, Naiwieng 19 :U Myntri ka sorkar pdeng uba dei khmih ia ka tnat Tourism u G Kishan Reddy ula wan ban plie ia ka “10th International Tourism Mart (ITM),” kaba la sdang ha ka 17 haduh ka 19 tarik mynta u bnai ha ka jingialang kaba la long hapoh R Dengthuama Hall ha Aizawl.
Na ka liang u Myntri Rangbah (CM) ka Mizoram, u Zoramthanga, u Robert Romawia Royte myntri ka tnat Tourism, ka Dr Renu Sharma Chief Secretary bad u Arvind Singh Secretary ka tnat Tourism kila ia don lang ha kane ka jingialang.
U Myntri ka sorkar pdeng ha ryngkat u CM ka jylla ryngkat lang kila buh ia u mawnongrim na ka bynta ki sawtylli ki projek, kata na ka bynta ka jingtei ia ka Aizawl Convention Centre ha Chite, PRASHAD Project, artylli ki Bamboo Link Roads kiba hap hapoh ka PM DevINE – Tuirial Airfield sha North Chaltlang bad na Lengpui shaSaiphal. Utei u myntri ula pyllait ruh ia ka Coffee Table Book jong ka Mizoram Tourism.
Haba kren ha ka jingialang, u G Kishan Reddy ula ong ba ka Mizoram ka dei ka jylla kaba itynnad bad kaba don shibun ki lad ki kabu ha kaba iadei bad ki kam shangkai bad ki kam jngohkai pyrthei, bad ba kane ka ITM ka don ia ka jingthmu ban plie ia ka jingiamir jingmut hapdeng ki tnat sorkar bad ki kynhun kiba ia don bynta ha ki kam jngohkai.
Ula ong ruh ba ka jingioh jong ka India ban shimti ia ka kam president jong ka kynhun ki ri G20 kan plie ia shibun ki lad ki lynti kiba iadei bad ki kam bei tyngka halor ki kam jngohkai pyrthei bad kiwei pat ki bynta.Une u myntri u kyrmen ruh ba ki jingialang jong ka G20 ki ban long ha ki bynta bapher bapher jong ka ri kaba kynthup hapoh kane ka thain shatei lammihngi (Northeast) kan plie ia ki rynsan ban pynpaw ia ka kolshor, ka histori bad ki kabu halor ki kam jngohkai jong ka thain sha ka pyrthei.Ha kajuh ka por u ai ka jingkhublei ia ka sorkar jylla halor ka jingdon ia ki YUVA Tourism Clubs hapoh ki skul bad ki kolej.
Na ka liang utei u myntri ula kdew ruh halor kiba bun ki kam pynroi hapoh kane ka thain northeast bad pynpaw halor ka jingkut jingmut jong ka sorkar pdeng ban wanrah ia ka ioh ka kot bad ka roi ka par hapoh kane ka thain baroh kawei.
Ha kajuh ka por ula ai ruh ka jingiaroh halor ka jingdon ia ki sorkar bad ki nongialam kiba skhem hapoh ka thain Northeast kaba la plie ia ki lad ki lynti na ka bynta ka roi ka par lyngba ka jingiatreilang bad kaba pynioh ruh ia ka jingmynsaw jong ka jingialeh.
Na ka liang u CM Zoramthanga ka Mizoram ruh ula kdew halor ka jingdonkam ban kyntiew shuh shuh ia ki kam jngohkai pyrthei ha ka jylla bad ai khublei kyrpang ia ka sorkar pdeng halor ka jingmynjur na ka bynta ban pyntreikam ia ki kam pynroi bapher bapher ha ka jylla.
U Robert Romawia Royte myntri ka tnat Tourism ka jylla ruh ula pynpaw ia ka jingkmen ban ioh pynlong ia kane ka ITM ha ka sien kaba nyngkong hapoh Mizoram.
