Nongstoiñ, Naiwieng 17: U Vice President ka FKJGP Bah Kitboklang Nongphlang ula ong ba ka jinglong nong ialam ka dei ka kam kaba kyntang jong ka Jaidbynriew, kaba ym dei ban khein dew thala ia ka.
Une u Nongialam ka FKJGP ula kren ia kane haba jingialang pynthymmai ia ki nongkitkam ka FKJGP Mawthad raishan Circle kaba la long ha Dorbar Hall Nongshillong myn ha ka 12 tarik u Naiwieng.
Ia kane ka jingialang la pynïaid da u General Secretary FKJGP West Khasi Hill bah Wilis Walker Syiem bad la ïoh ban pynkup burom ïa ki nongïalam ba la shong thait jong ka Mawthadraishan Circle da u Chief Organiser FKJGP Sengkmie u bah Khrawkupar Nongsiej.
Ki Nongïalam ba thymmai jong ka FKJGP Mawthadraishan Circle ki long u President bah Firstborn John Marngar, Vice President bah Michael Marweiñ, General secretary bah Silenstar Kharbani bad kiwei kiwei. Ha kane ka sngi la ïa donlang ki riew rangbah jong ka thaiñ Mawthadraishan.
Haba ai jingkren, u bah Kitboklang Nongphlang u la batai ïa ka lynti treikam jong ka seng bad u la ong ruh ba haba don bad ka FKJGP, dei ban kynmaw bha ba ym dei ban kheiñ dew thala ïa ka jinglong nongialam namar ka dei ka khyrnit ba kyntang tam jong ka jaidbynriew.
U la ong ruh ba ki shnong ki thaw ki shaniah ha ki dkhot ka seng ïa ka synshar ka khaddar, kumta dei ban long ki nongïalam ba shlur ba ïaineh bad len lade na ka bynta ka daw bah jong ka jaitbynriew ba mynta bad ha ka pateng ka ban sa kha, ong une u Nongialam
Ha kawei pat ka khubor, ka Federation of Khasi Jaiñtia and Garo People Rimuliang Circle kala pynpaw iaka jingsngewkmen haba ïoh jingtip ba na ka liang ka Sorkar Meghalaya, kan plie sa ïa ka Rimuliang Block. Kane ka dei ka mat kaba kum ka seng ka ai jingïaroh bad pyrto da shisha ïa kane ka Sorkar kaba mynta kaba la ïohi jngai ban wanrah sa ïa ka Rimuliang block.
“Kum ka seng haba ngi ïoh pdiang ïa ka block, ngi dei hok ban pdiang ïa ka da kaba kmen, ka jingkyntu ïa ki nongïalam shnong ki seng samla shnong ki para seng bha lang ka long ba ngin ïa tylli lang kawei ban ym don kano kano ka jingwit ne ka huri hura, khamtam ba na ka liang ka Sorkar kan sa buh ïa u mawnongrim jong ka C&RD Block ha ka 22/11/2022”, ong u President bah Rusfulson Wanniang.
“Ha kabae ïa dei bad ka jaka ban sa tei ïa ka parmanent office Building jong ka Block, na ka liang ka seng ngim don kano kano ka jingujor, namar ïa kane ka kam kan shong eh ha ka Sorkar bad ki bor shynshar shnong bad ki bor shynshar Hima ha ka thaiñ, hynrei tangba kan dei ka Block hapoh ka thaiñ Ri muliang”, u la ban biang.
“Ka jingai Block ha ka thaiñ kam dei ka jingïohnong ne jingmyntoi jong kano kano ka kynhun ne ka seng saiñ pyrthei jongno jongno, hynrei kan dei ka jingmyntoi ïa u duk u suk bad ki paidbah ha ka dong ka thaiñ hi baroh kawei”, u la pynkut.
