Nongstoiñ, Naiwieng 17: U Symbud Myntri Rangbah ka Jylla Bah Prestone Tynsong hynne ka sngi palei, ula plie ia u mawnongrim ban shna ia ki surok ha sor Nongstoin bala mang T. 29 klur bad kumjuh ruh ia ka Inspection Bungalow jong ka Tnad PWD kaban don ha Upper New Nongstoin.
Ia kane ka jingialang plie mawnongrim la pynlong ha phyllaw jong ka Ophis treikam ka Tnad PWD ha ka jingia donlang u MLA ka Nongstoin Bah Macmillan Byrsat, u MLA ka Mawshynrut Bah Gigur Myrthong, u Deputy Commissioner bad ki Heh Ophisar ka Tnad PWD bad kiwei kiwei.
Haba kren ha ka jingialang, u Bah Prestone ula ong ba ha kine ki san snem duna ka sor Nongstoin kala kylla dur bun shah namar ba ka Sorkar kala phaikhmat bad leh ia shibun ki kam na ka bynta ka bha ka miat jong u paidbah.
Ula pyntip ba kane ka Sorkar ba ialam da ka NPP kala pynlog haduh T.18000 klur tang na ka bynta ban shna ia ki surok ha baroh kawei ka Jylla.
“Ka jingwan jong nga ha Nongstoin kam dei na ka bynta ban pynbiej elekshon ia ki paidbah hynrei ban pynshai ba ka NPP ka don ia ka thong ba lada kan ioh ban synshar biang ha u 2023 haduh 2028, ka thong ka long ba kan wanrah shibun ki jingmyntoi ia ki paidbah ha baroh ki liang ka ban long ruh arshah laishah na kaba wanrah mynta” ula ong.
U Symbud Myntri ula kyntu ia ki paidbah ba kin ai ka jingiatreilang bad ka Tnad PWD da kaba kin ai kylluid mynsiem ia ki jaka ban shna ia ki surok khang ba ki jingtrei kin dep kloi.
Shuwa kane, u Symbud Myntri Rangbah ula pyllait paidbah ia ka Mahindra Pickup kaba la ai da u MLA sha ka Town Committee ba kan pyndonkam ha kaba kit nuit. U Symbud Myntri Rangbah ula aiti ruh ia u shabi jong kane ka kali sha u Deputy Commissioner ba un sa leh ia kaba donkam.
Kiwei pat kiba la ai jingkren ki ia u bah Macmillan Byrsat , bah Gigur Myrthong, bad u Chief Engineer ka PWD.
