Tura, Naiwieng 17 : U MDC ka BJP na Tura Bernard N Marak uba la shah kem ha ka taiew ba khatduh jong u Naitung bad pynlut por haduh saw bnai ha Tura Jail, ula lait na along da ka hukum ka Iingkashari Meghalaya High Court ban ai bah jamin na ki case bala register pyrshah ia u da ki Pulit ka Tura.
Ha ka janmiet sngi Balang, u Bernard ula mih na phatok ha ka sien ba nyngkong bad la pdiang sngewbha ia u da ki paid nongkyrshan bad ki nongiarap, kiba la leit sngewlem sha Iing jong u ban ai khublei.
“Nga da sngewnguh eh ia u Blei uba la khmih ia nga bad mynta ka sngi ka hok kala ieng rasong” ong u Barnard hadien ba ula lait na phatok.
Ula pynpaw ruh ba um buhnud satia iano iano ruh hynrei un iai bteng ia ka lynti ban wanrah ia ka jingkylla na ka bynta ki paidbah ka Jylla Meghalaya.
“Nga dei u kyrtong jong ka BJP na South Tura bad ngan iakhun ia ka elekshon nangne ban wanrah ia ka jingkylla ia ki briew jong nga” ong u Bernard haba pynkhreh ban mih iakhun pyrshah ia u Myntri Rangbah ka Jylla Conrad K Sangma na kane ka Constituency.
Halor ki jingkynoh ba ka Sorkar ka pyrshang ban phah set along beit ia u khnang ba kan nym don jingma ia u Myntri Rangbah ha ka elekshon ban wan, u Bernard ula ong “La ka dei ka kam sain pyrthei ne kiwei kiwei, ki paidbah kin sa bishar hi dalade”.
U Bernard ula shah kem bad shah pynngat haduh28 tylli ki case hadien ba ki Pulit kila leit khynra ia ka farm house jong u ha u Naitung ha kaba la kynnoh ba ula pyniaid ia ki kam awria, jrong kti ia ki Khynnah rit, kurup tiar pynbthei bad kiwei kiwei.
Ula shah kem na Hapur District ka Uttar Pradesh hadien ka lookout notice bala pyllait ha baroh kawei ka Ri India namar ka jingphet rieh. Ulan eh haduh 333 sngi hapoh ka Police Custody.
