Shillong, Naiwieng 16 : Ka Iingkashari Meghalaya High Court hynne ka sngi Balang kala khyrwit ia ka Sorkar Jylla halor ka jingbym biang ki tiar bad jaka sumar ia ka jingpang bampong hapoh ka Jylla.
Haba shong bishar ia ka PIL halor kane, ka Division Bench kala ong watla ka Sorkar kala dep buh ia ka Unit ha Shillong Civil Hospital kaba don tang katto katne ki jingthiah bad bala buh ruh ban plie ia kane ka jaka sumar ha u bnai ban wan, hynrei la paw ba kam pat idon satia ia ki tiar sumar ba pura ban ai jingsumar ia ki nongpang.
Da ka jingnang bun ki nongpang Oral Cancer (bampong na shyntur) ha ka Jylla kaba dei ruh kaba bun tam hapoh ka Ri, khamtam ha ki thain sepngi ba ka jingbam kwai ka jur bha, ka Iingkashari kala ong baka don ka jingartatien ba ki tiar kiba la don mynta ha Jylla kin long kiba biang ban sumar.
Ha kano kano ka bynta ruh, watla kine ki tiar sumar ki lah ban lam sha ka jinglap kloi ia ka bampong, ka Jylla kam don satia ia ki lad ai jingsumar ban ai sha ki nongshongshnong hadien bala shem ia ka jingpang.
Haba pynpaw ia ka jingkhmih lynti ba ka Jylla kan iatehlok bad ki jaka sumar bampong ba na shabar ka Jylla, hynrei kala ong “Hynrei kam shym la don satia kum kane ka jingpyrkhat haduh mynta”.
Ka Iingkashari kala ong ba kam shym la don satia kano kano ka jingpyrshang n aka liang jong ka Sorkar ban khot ia ki Private Operator ba kin plie ia ki Cancer Hospital hapoh ka Jylla.
“Ka lah ruh ban long ha kaban ithuh ia kawei ne artylli ki jaka kiba longpdeng ha kaba lah ban khot ia ki Private Operator ba kin plie ia ki cancer hospital ha ka rukom ka ban iahap ia baroh arliang kata ka Jylla bad kane ka kynhun shimet. Hynrei kam shym la don ka jingpyrshang jong ka Jylla ban leh eiei halor kane ka bynta” kala ong.
Haba kdew ia ka jingpynsngew ba ka Jylla kala shim ia ki sienjam ban ai jinghikai ia ki nongshongshnong ban pynduh noh ia ka jingmlien ban bam kwai, ka Iingkashari kala ong “Watla ka don ka jingialap kaba jur halor kane ka bynta, hynrei na ki jingshem ha kiwei pat ki jaka kum na ka jingdih duma, ka pynpaw ba ki jingpyrshang ba da ki phew snem ne spah snem kin seisoh khyndiat eh. Haba kut ka sngi, ki jingialap lane ka jingleh screening kim lah ban long kongsan ha ka jaka jong ki jaka sumar”.
Haba pynpaw ba kam I don dak ruh ba ka Sorkar Jylla kan pyrshang ban pan ia ka jingiarap na ka Sorkar Pdeng halor kane ka kam, ka Iingkashari kala ong ba ki don ki Cancer Research Institute bala pyniaid da ka Sorkar Pdeng bad da ka jingkhih bad jingpyrshang, lehse ka Sorkar Pdeng ka lah ban seng ia ka Unit ha ka Jylla. Khlem artatien ba ka jingseng ia ki jaka ai jingsumar ka dei kaba lutbha.
Ka Iingkashari kala buh ban bishar biang ia kane ka mukotduma ha ka 6 tarik u Rymphang.
