Shillong, Naiwieng 16: Ki sengbhalang ba kynthup ka HYC, JSM, CORP, EJNC bad ka HANM hynne ka sngi ki la dawa na ka sorkar jylla bad kadei ban pynbeit bad ban pynkylla ia ka Standard Operating Procedure (SOP) haba iadei bad ka jingai ia ki lisen ban tih dewiong.
Haba kren sha ki lad pathai khubor u president ka HYC u bah Robertjune Kharjahrin u la iathuh ba ki 5 kynhun sengbhalang ki la buh da ka dorkhas sha u Myntri Rangbah ka jylla Conrad Sangma bad sha u Symbud Myntri Rangbah ka jylla bah Prestone Tynsong ban dawa pynkylla ia ka SOP ai lisen ban tih dewiong.
U bah Robertjune u la ong ba ka sorkar hapoh ka jingialam ka NPP ha ka 5 tarik Lber 2021 ka la pynmih ia ka SOP Notification bad hapoh kane ka SOP ki wanrah ia ki kyndon bad kiei ki jingdonkam ba ki nongaplai kidei ban pynbiang ha shwa ban ioh ia ka Lisen.
“Ki don shibun ki kyndon ba la buh ha kane ka Notification bad ki don ar tylli ki mat kiba ktah ia ka ri bad ka jaidbynriew bad lada pule bniah ia ka SOP, ka kdew shai ba kane kadei kaba la shna da ki high Level bad jong ki High Level namar ba ha kawei na ki kyndon ba la buh ha ka SOP la kdew ba ki briew kiba aplai ia ka lisen ki hap ban don ia ka jaka kaba ym duna ia ka 100 hectar,” ong u bah Robert.
U bah Robert u la ong ba ka jingbuh ia ka kyndon jaka ba 100 hectar kan sbuh jingeh shibun bad ka pynduh noh ia ki briew kiba la im ja na ka kam tih dewiong.
U la ong ba ki briew kiba lah ban don jaka kaba heh kidei tang katto katne ngut bad ka ailad tang ia ki hehspah bad ki kompeni hehspah ban leh ia kane ka kam khaii ha kane ka jylla bad kan wanrah ia ka jingiapher ha ka jingioh bynta ha ka spah ka phew.
Shuh shuh u la bynrap ba ka sorkar jylla kam shym la bud ia ka kyndon jong ka Mineral Concession Rules, 1960 ka sorkar pdeng namar katkum ka Mineral Concession Rules, 1960, la kdew ba kiba aplai ia ka lisen ki dei ban don ia ka jaka kaba ym duna ia ka 4 hectar hajrong.
“Kane ka SOP jong ka sorkar jylla kam iahap ia ka jinglong jingman jong ki jaka ha kane ka jylla bad namar kane ki san tylli ki seng ki dawa badei ban pynduh noh ia ka SOP jong ki High Level” la ong u bah Robert.
Nalor kane u bah Robert u la ong ba kaba kham sngewkhia ka long ba katkum ka SOP, la shah ia uno uno u briew ne ka kompeni ban shu iasoi ia ka Soskular bad ki trai jaka bad ki lah ban iaid shakhmat ha ka jingaplai ia ka lisen.
U la ong ba kane ka kdew shai ba ka sorkar jylla ka kwah pyniaid Benami daka ba die tad iaki jaka sha ki bar jylla ne ki kompeni bar jylla ban tih dewiong bad ban kjit iaka spah jong ki trai ri trai muluk.
