SHILLONG, Naiwieng 16: Ka seng Hynniewtrep National Youth Front (HNYF) hynnin ka sngi ka la leit ban khynra bad beh noh iaki nongtrei ka Indian Political Action Committee (I-PAC) kiba don ka office treikam ha Nongthymmai Springside Block-2.
Ka seng ka shim ia kane ka sienjam ban leit ban kynra iaka ophis I-PAC hadien ba ka ioh jingujor na ki bor shnong ba kane ka I-PAC ka la iaid lait ia ka shong namar ka jingbym lah ban pyni ia ki sakhi bad ki kot ki sla kiba biang ban pyntrei ia katei ka office hapoh ka shnong.
Haba kren sha ki lad pathai khubor u Assistant General Secretary ka HNYF u bah Tyllibor Swer u la iathuh ba ka jingwan kynra ia kane ka ophis treikam ka I-PAC kadei namar ka jingbym lah ban pynbiang ia ki kot ki sla sha u Licensing Ophisar ka KHADC.
U bah Tyllibor u la iathuh ba katkum ka jingthoh na u Licensing ophisar ka KHADC, la pynshai ba kane ka company kam pat ioh ia ka License bad la sakhie ruh de ba kane ka I-PAC ka la ai kontrak pateng ia kiwei pat ki company niah kali kaba la tip kum ka Caplib PVT Ltd.
“Ka seng kan buh por ha ka 22 tarik mynta u bnai ban leh kham kloi ban pynbiang ki kot ki sla jong katei ka Office na ki bor ba dei khmih iaka khaii pateng ka KHADC bad ha kajuh kapor kadei ban thungkam kham bun iaki samla trei jylla” la ong u bah Tyllibor.
U bah Tyllibor u la ong ba ka seng kala buh ia ki mat jingdawa ha khmat ki nongialam ka TMC kiba la wanpoi lang ha kane ka office treikam ba kadei ban weng noh ia katei ka company Cablip bad ban pynrung ia ka All Shillong Tourist Taxi Organization bad ka dei ban khot biang ia ka Interview thepkam ban pynrung kham bun ia ki samla khasi ha katei ka Compeny.
Na ka liang u rangbah dong ka Nongthymmai Springside u bah James Khongwir ha ba don lang ha kane ka office ula ong kane ka company kaba wan na Kolkata ki la wan pan ia ka NoC na ka shong ban ia leh ia ki Trading License haduh u bnai iaiong hynrei katkum ba la ioh jingtip ki dang leh myn shem bnai,pynban watla katta ka jingia kren bad ka shong kaba shai naduh ba sdang hynrei mynta kila sdang ban pyntrei kam sha khmat ia ka company naduh kat mynta watla kila iaid lait ia ka bor jong ka shnong.
