Shillong, Naiwieng 16: U President ka Hills State People’s Democratic Party (HSPDP) bah K.P Pangniang hynne ka sngi u la pynbna baka party kala shah kynthup lang haka kynhun National Federation of New State (NFNS) ka ba dawa jylla ba pura hapoh ka ri India.
Haba kren sha ki lad pathai khubor hadien ka jingialang Central Executive Committee (CEC) u bah Pangniang u la iathuh ba kan don ka jingialang haka 30 tarik mynta u bnai ha Mawphanlur kum shi bynta ban nang pynkhlain shuh shuh iaka sur dawa jylla la ka jong kata ka Khasi-Jaintia State.
U bah Pangniang u la ong ba ia kane ka rai ban dawa jylla Khasi-Jaintia State kadei hadien ba ka HSPDP kala wan shim bynta haka jingialang dawa jylla laka jong kata Garo Land naka bynta ki jaidbynriew Garo jong ka jylla.
“Naduh ki snem bala leit, ka HSPDP ka ieng haka nongrim ban dawa jylla laka jong kata ka Khasi-Jaintia States bad dei namar kane ka party ka kyrshan ruh iaka jingdawa Garo Land daki jaidbynriew Garo jong ka jylla” la ong u bah Pangniang.
U bah Pangniang u la ong ba ka jingshah kynthup ka HSPDP haka NFNS ka dang pynkhlain shuh shuh iaka sur dawa jylla laka jong namar ka NFNS ka don bynta ban iarap ia kiwei ki jaidbynriew rit paid ka ri India ban ioh jylla laka jong.
Nalor kane u bah Pangniang u la iathuh ba haka CEC ka HSPDP kala shim iaka rai ban pynkhlain shuh shuh iaka jingdawa naka sorkar India ban wanrah jingkylla iala para 12 A (b) jong ka khyrnit ba hynriew, ban pyntreikam iaka ILP, ban ioh jingithuh iaka ktien Khasi hapoh ka khyrnit ba phra ka riti synshar bad ban pynbeit noh ia u pud u sam hapdeng ka jylla Meghalaya bad ka jylla Assam.
Shuh shuh u bah Pangniang u la ong baka HSPDP ka kloi ban bishar bniah biang iaka bhah thungkam khamtam naka bynta ki samla Khasi-Jaintia.
