Nongpoh, Naiwieng 13 : Ki riew paidbah ki bym lah ban tip ki dei kiwei, kila hiar ban pynpra ia u mawnongrim bala wan thung da ka Sorkar Assam ha Block-II ban tei ia ka IB jong ka Tnad Forest.
Kane ka jingjia kala jia ha ka miet sngi saitjain por 9 baje eiei ha ka shnong Jatalong, kaba hap hapoh ka Raid Nongtung, Block-II.
Kat kum ka khubor bala ioh lum, la iathuh ba ki heh Ophisar ka Sorkar Assam kila wan ban thung ia une u mawnongrim ha ka por 12 baje mynsngi jong ka sngi saitjain.
Kat kum ki jingthoh bala paw ha une u mawnongrim la batai shai ba u dei na ka bynta ban tei ia ka Forest IB bad la wan buh ia ka da u Dr. Tuliram Ronghang, CEM ka KAAC, ha ryngkat ka jingdonlang u Horensing Bey, MP, nangta u Rupsing Teron, MLA, u Abhijit Kro, MAC lem bad kiwei ki ophisar sorkar.
Ka khubor ka iathuh, ki paidbah na katei ka shnong kila pyni ia ka jingbym sngewtynnad haba iohi ia kane ka jingwan thung mawnongrim ka Assam bad kila niew ruh baka dei tang ka buit ban pynibor bad ban iohkam trai ia kane ka jaka ka ban sa don mynta ha ka jingiakren pynbeit pud hapdeng ka Meghalaya bad ka Assam.
La suba jur ba dei ki paidbah na kane ka shnong kiba la mih bad leit pynpra ia une u mawnongrim ha ka por mynmiet.
