Shillong, Naiwieng 12 : U Nongialam ka UDP bad Symbud Myntri Rangbah ka Jylla Bah Bindo M Lanong hynne ka sngi saitjain ula ong ba ka long kaba donkam ban khmih bniah ia ka jingdawa ban shong bishar biang ia ka State Reservation Policy kaba la 50 snem.
“Ka long kaba eh ban ong hynrei ban khmih bniah ia ka da ka jingsngew kitkhlieh, ka jingbym shah liang bad ka jingpyn shong nongrim ia ka, nga sngew ba kam long kaba sniew. Nga sngew ruh ba donkam ban pan jingmut ruh na ki paidbah” ong u Bah Bindo haba iakren bad ki nongthoh khubor.
Une u Nongialam ka UDP ula pynkynmaw ruh ba ka seng ba nyngong eh ba dawa ban pynkylla ia ka Reservation Policy ka dei ka Khasi Students Union (KSU) bad ong “Kila sdang ia ka jingdawa naduh u snem 1970 ban pynkylla ia kat kat kum ka jingdon ki jaidbynriew”.
“Wat u Captain Williamson A Sangma, u Myntri Rangbah ba nyngkong ka Jylla, u sngew ba donkam ban wanrah ia ki jing pynkylla bad sdang ruh ban shim iaki jingai jingmut jong ki paidbah bad hadien ula wanrah ia katto katne ki jingtyrwa. Hynrei kane kala kut noh hadien ba u Captain Sangma ula mih noh na ka kam sain pyrthei. Hadien kane, kane ka kam kala shu sahkut kumjuh” ong u Bah Bindo.
“Wat ha ka por ba u dang don, katto katne ki kynhun kila pyrshah ia kane ka jingthmu. Nga pynkynmaw b aula pynpaw ia ka jingsngew sha u paralok ba iatreilang Bah PR Kyndiah, BB Lyngdoh bad kiwei- ba ngi lah ban shong bishar hynrei ngin buh shuwa kumba ka long tad haduh ban da dep iasyllok bha. Kane ka dei ka jingthmu jongu Captain Sangma bad dei ma u, uba sdang ia ka jingpyrkhat ban wanrah ia ki jingpynkylla ym tang ban pynsngewtynnad ia ki paidbah, ka jingleh hok kaba dei ban don hynrei ban wanrah ruh ia ka jingpynbeit da ka jingiasuk lang” ula bynrap.
