Guwahati, Naiwieng 10 : Ka sorkar pdeng bad ka sorkar Assam kila iatrei lang ryngkat na ka bynta ban kyntiew ia ka roi ka par lyngba ki jingtei bad ki surok kiba pyniasoh.Kane kala paw shai ruh hadien ka jingwan jngoh ba dang shen da u myntri ka sorkar pdeng u Nitin Gadkari sha kane ka jylla.
U Gadkari uba dei u Myntri ba khmih ia ka tnat Road Transport and Highways Department, ka sorkar India ula wan poi ha Assam ha ka jingwan jngoh ba laisngi ka jong u naduh hynnin ka 9 tarik haduh ka 11 tarik mynta u bnai.Ha katei ka sngi wan jngoh kaba nyngkong hi, une u myntri ula pynbna halor kiba bun tylli ki projek kam pynroi ba la mang da ka sorkar pdeng na ka bynta ka jingmyntoi jong ka thain shatei lammihngi (northeast) hi baroh.
Ka list kaba iadei bad ki projek bala aijingmynjur ki kynthup ruh ia haduh shiphew tylli ki flyover bad ki surok lyngba ki jingkieng ha baroh ki bynta jong ka Assam.
Baroh ki jinglut na ka bynta kine ki projek ba la pynkhreh da ka sorkar pdeng ka long haduh T.738 klur. Namar ka jingwan lyngba ka tnat National Highway Authority of India, kumta ruh la khmih lynti ba yn lah ban pyndep ia kine ki projek ha ka por kaba biang.
“Ha ka jinglamkhmat jong u Myntri Rangbahduh (PM) Narendra Modi, ka Assam kala sakhi halor shibun bah ki kam pynroi.Ka jingkhublei ka liet sha u PM bad u Myntri ka sorkar pdeng u Gadkari halor ka jingai jingmynjur na ka bynta ka jingtei ia ki 10 tylli ki flyover bathymmai nalor ki ROB projek ki ban kot sha ka 738 klut hapoh Assam,” pynpaw u Myntri Rangbah (CM) ka Assam u Himanta Biswa Sarma lyngba ka twitter.
Ia ki jaka na ka bynta ban tei ia kine ki shiphew tylli ki flyover kumjuh ia ki projek shna surok lyngba ki jingkieng la dep ban pynbna da ka sorkar jylla.Ki thain ia kiba yn pyntrei ia kine ki projek ki kynthup ia ka Kathiatoli, Borghat, Demow, Raha, Baihata, Simlaguri, Bongaigaon Refinery, Chapaguri, Pathsala bad Jagiroad.
Sa artylli kiwei pat ki projek bala ap khmih lynti la slem ruh la pynbna ha katei ka jingialang, kata ka jingpyntrei ia ka Guwahati Outer Ring Road Project bad ka Khanapara – Airport Ropeway Project.
Katei kaba nyngkong kan pynlong ia ki nongleit nongwan ba kin iaid lait na baroh ki lynti na ka sorbah Guwahati lada kim kwah ban rung, bad kumta ruh kane kan iarap shibun ban tehlakam ia ka jingdheng kali.katba ka projek kaba ar ka thmu ban pynsuk ia ka rung ka mih hapdeng ki jaka tduh jong ka sorbah, bad kane kan iarap ia ki nongleit nongwan ba kin poi shapoh ka kad liengsuin tang ha i por iba khyndiat.
Kine ki projek kin iarap ym tang ia ka jylla Assam hynrei ia ka thain northeast hi baroh kawei.
