Agartala, Naiwieng 10 : Da kaba kynthoh pyrshah ia ka sorkar synshar BJP halor ka jingkhanglad ban trei ha ki jaka jong ki trai shnong riewlum ha Tripura, u myntri barim uba dei ruh u MLA jong ka seng Indigenous People’s Front of Tripura (IPFT), u Mevar Kumar Jamatia uba la leit ban pyniasoh noh ia lade sha ka TIPRA Motha hynnin ka sngi Balang ula kam ba haduh palat 90 percent ki kynhun seng bapher bapher jong ka IPFT kila leit ban pyniasoh bad ka TIPRA Motha.
Hashwa ka ilekshon assembly 2018, ka IPFT bad ka BJP kila ia synrop lang bad thaw ia ka sorkar da kaba pynkut noh ia ka jingsynshar ba 25 snem jong ka left front.
Haba kren ha ka jingialang bad ki lad pathai khubor ha Ujjayanta Palace ha ryngkat ka jingiadon lang u khun syiem ka Tripura u Pradyot Kishore Manikya Debbarma, utei u myntri barim ula ong ba ula trei mynta la bun bun snem, kata khamtam na ka bynta ka bha ka miat jong ki trai shnong riewlum.
“Lymda ngi lah ban iatylli lang kawei ngin ym lah satia ban pynurlong ia ki jingdawa ki jong ngi. Ka BJP kala dawa pyntreikam ia ka NRC bad CAA hynrei ka jingdawa ka jong ngi ka long na ka bynta ka Greater Tipraland namar ki rukom pyrkhat kam ki jong ngi ki iapher.Ka thong ka jong ngi ka long ban ioh ei ei, bad ngi kwah ia ka jingangnud, bad lada kane kam urlong ngin ym ailad satia,” ong utei u myntri barim.
Da kaba kam ba u dei u nongseng ia ka party IPFT, une u myntri barim ula ong ba hadien bala thaw ia ka kynhun synrop bad ka BJP, ki jingtreikam jong ka party kila sdang ban suki.
“Kham hashwa ngi don ia shibun ki jingleh jingkam, hynrei hadien ka jingiasynrop bad ka BJP, kine ki jingtreikam kila duh la dam noh. Khlem kino kino ki jingtreikam kumno ki paidbah kin kyrshan ia ka IPFT? Kalong da shisha kaba sngew bynniaw shibun ba ka BJP bad ka BJP Janajati Morcha kaba dei ka unit jong ki trai shnong riewlum kila shah khanglad ban trei ha kito ki jaka jong ki trai shnong,” kynnoh shuh shuh u Mevar.
Nalor kata ula kynthoh tyngeh ruh ia ka BJP halor ka jingbym lah ban pynurlong ia ki jingdawa ia kiba kala kular hashwa jong ka jingiateh lok.
“Ha ki saw snem kum u myntri sorkar, Nga la pyrshang ban leh ei ei na ka bynta ki paidbah hynrei ngam shym la ioh lad. Wat ka sorkar kam shym la lah ban pynurlong ia ka jingdawa kaba rit eh jong ngi.Nga la kyntu la bun bunsien ban pynurlong ia ka jingdawa ban pyntreikam ia ki dak thoh roman scripts na ka bynta ka ktien Kokborok. Ngi la pass ia ka bill hapoh ka jingialang jong ka kynhun myntri na ka bynta ban pynkylla ia ka kyrteng jong ka Tripura Tribal Areas Autonomous District Council sha ka Tripura territorial council hynrei ym shym la leh ei ei halor kane.Hashwa jong ka jingiateh, ngi la don ia ka jingiamynjur na ka bynta ban thaw ia ka high-level committee ka ban khmih ha kaba iadei bad ka roi ka par bad ban kyntiew ia ka imlang ka shalang jong ki nongshong shnong kiba dei ki trai shnong riewlum ka Tripura.Ia kane ka committee la thaw ha u snem 2018 bad la kdew ba tang hapoh ka lai bnai yn sa pyllait ia ka kaiphot (report) hynrei saw snem kila leit noh hynrei ym shym la iohi satia ia katei ka kaiphot.Nga la kyntu la bunsien ia ki myntri ka sorkar pdeng, hynrei kim shym la pynsngap,” kynnoh shuh shuh utei u myntri barim.
Shuh shuh ula pyntip ruh ba ka IPFT ka don 34 ki division ha kaba napdeng kine haduh palat 90 percent na ki kynhun seng jong ka IPFT kila leit ban pyniasoh bad ka Tipra Motha. “Kila don katto katne na ki kiba la mih noh hynrei nga ngeit ba ha kine ki khyndiat sngi kin sa wan ban pyniasoh lang,” ong une u myntri barim ka Tripura.
Katba na ka liang u chairman jong ka TIPRA Motha, u Pradyot ula ong, “Thansa” ka mut ka jingiatylli bad ban iatreilang na ka bynta ban ioh im, na ka bynta ki hok, na ka bynta ki jingdonkam bad na ka bynta ka jingdawa ia ki riti synshar khadar da kaba weng noh sharud ia kino kino ki jingsngew iapher.Ki party sain hima kila pyndonkam ia ki trai shnong riewlum tang na ka bynta ban ioh vote bad ban ioh nong ha ki kam sain hima sima.”
