Agartala, Naiwieng 09 : U Myntri Rangbah (CM) ka Assam u Himanta Biswa Sarma ula ong ha ka sngi Nyngkong ba la lah ba ka BJP lem bad ki kynhun synrop jong ka kin dang bteng ban bat ha ka bor hapoh Tripura, Nagaland bad Meghalaya, kata hadien ba ki leit sha ka jingiathep vote ha une u snem u ban wan.
Haba aijingkren ha ka jingialang ‘Booth Vijay Abhiyan’ ha katei ka sorbah, u Sarma u la ong hadien ba ka sorkar synrop ba la lamkhmat da ka BJP kala wan ha ka bor hapoh ka sorkar pdeng bad ha kiba bun ki jylla ka thain shatei lammihngi (Northeast), kumta ruh ka rai ka par kala sdang ban wan ha kane ka thain.
“Naduh u snem 2014, u Myntri Rangbahduh (PM) Narendra Modi ula pynlong ka jingwan jurip sha ka thain Northeast haduh 60 sien.Ym pat ju don ki PM ka ri India ki ban iohi ne phaikhmat sha ka thain Northeast.Kila don haduh san ngut ki Myntri ka sorkar pdeng na ka thain Northeast ha ka sorkar jong u Modi mynta,” ong u CM Sarma.
Nalor kata u Sarma ula ong ba ha u snem 2018, ka BJP-IPFT (Indigenous People’s Front of Tripura) kila jop haduh 44 tylli ki seat na ki 60 ngut ki dkhot jong ka Tripura Assembly, bad ha kane ka ilekshon ka ban wan kine ki kynhun synrop kin iap haduh kumba 55 seat.
Ula ong ruh ba ka jingkiew ha kaba iadei bad ki lad jingtip kila wan jia ha Tripura, kata hadien ba ula kdew sha ka Forensic University campus, ka National Law University, ka jingpyniar ia ki lynti iaid rel, kawei na ki kad liengsuin kaba heh tam ha Agartala nalor kiwei pat.
Shuh shuh u Sarma ula ong ruh ba ka CPI-M bad ka Congress ki lah ban pyniasoh lang hashwa jong ki ilekshon, hynrei na ka liang ka BJP kam don jingsyier halor kano kano ka jinglong jingman.
Wat lada baroh kiwei pat ki party kin iatreilang hashwa ka ilekshon, hynrei yn ym don ba lah ban pynrem ia ka BJP, ong shuh shuh u CM ka Assam.
Haba kynthoh ia ki party Left, u Sarma ula ong; “Ka BJP ha Tripura ka don shibun ki nongialam ki ban ialam ia ka party.Hynrei, ki briew kim tip uei u nongialam jong ka CPI-M ha Tripura.Kane ka party kala synshar ia ka jylla la bun bun snem, hynrei kam shym la leh ei ei na ka bynta ka Tripura.
Ha kane ka jingialang la wan iashim bynta ruh da u CM ka Tripura u Manik Saha, u CM barim u Biplab Kumar Deb, u president ka BJP ka Tripura u Rajib Bhattacharjee, u coordinator ka party na ka bynta ka thain Northeast u Sambit Patra, ka myntri ka sorkar pdeng na Tripura ka Pratima Bhoumik bad kiba bun kiwei pat ki nongialam jong ka party hapoh central.
