Guwahati, Naiwieng 09 :Ha kawei pat ka jingkylla ba dang shen halor ka jingiap ba kham pher jong kawei ka khynnah ha Dhula hapoh Darrang ka Assam, na ka liang ka tnat Crime Investigation Department (CID) kala khot hajir ia u Executive Magistrate jong ka Dalgaon Revenue Circle kaba hapoh Darrang district ia uba la tip kyrteng kum u Ashirbad Hazarika.
Lah ban kdew ba une u Magistrate ula shah kyntu ban wan mih hakhmat u heh ophisar jong ka tnat CID uba pynlong ia ka jingtohkit mynta ka sngi ha ka por 11 baje mynstep.
Nalor kata lah ruh ban kdew ba une u magistrate khlem da pynlong ka jingleit jurip ia ka jaka ba la jia ka jingiap jong katei ka khynnah, ula pynbna ba kane ka khynnah kala khlad noh namar ka jingpynkut hi iala ka jingim.
Kumjuh na ka liang u Myntri Rangbah (CM) ka Assam u Himanta Biswa Sarma ruh ula hukum ban pynlong ia ka jingtohkit kaba bniah ha kaba iadei bad kane ka jingjia. U Hazarika ula don hapdeng ka jingphetrieh hadien ba ka kyrteng jong u kala mih paw ha ka por ba la pynlong ia ka jingtohkit.
Ha kawei pat ka liang, ka kynhun CID na ka tnat pulit ka Assam kala kem bad sospon noh ia uwei u heh pulit ha kaba iadei bad ka jingiap jong katei ka khynnah 13 snem rtaha Dhekiajuli.
Kum ban shu pynpaw ba ha ka 7 tarik mynta u bnai u Rupam Phukan, uba dei u Additional Superintendent of Police (ASP) ba la sospon ka Darrang district ula shah rah noh ha ka tnat CID na ka bynta ban pynlong ka jingtohkit halor ka jingleh sting ha kaba iadei bad ka jingtohkit halor kate ka jingjia shah pyniap ba kham pher jong katei ka khynnah hashwa ba un shah kem noh ar bnai hadien.
Ka tnat CID kala pynlong ruh ka jingkhynra hapoh ka iingsah jong utei u ASP bala shah kem noh ha Suwalkuchi ha ka 7 tarik mynta u bnai.
Laingut ki doktor jong ka Mangaldoi Civil Hospital ruh kila shah kem noh halor ka jingai ia ka report postmortem kaba la shu shna thok halor ka jingiap jong katei ka khynnah Adivasi hapoh ka thain kaba hap hapoh Dhula police station ha Darrang.Kine ki laingut ki doktor ba la shah kem noh ki kynthup ia u Dr Arun Deka, Dr Anupam Sharma bad ka Dr Ajanta Bordoloi.
Katkum ka jingujor, ia katei ka jingiap ba kham phylla jong katei ka khynnah hapoh ka iingsah jong u dkhot ka tnat pahara u Krishnakamal Baruah hapoh Dhula ha Darrang la pynkylla sha ka kam pyniap hi da u heh pulit u Utpal Bora.
Hadien u Bora ula la iasylla ba ki doktor kiba leh ia ka post mortem. Hynrei hadien jong kane ka jingjia kila mih ki jingiakhih paidbah ha ki bynta bapher bapher ka jylla kiba la dawa ban pynioh ia ka jingbishar hok.
