Shillong, Naiwieng 06 : Ka Election Commission ka Ri India (ECI) kala bthah ia ki Chief Secretary bad ki Director General of Police (DGP) ka Meghalaya, Nagaland bad Tripura, ki ban sa leit sha ka elekshon ha u snem 2023, ba kin aiti ia ka kaiphod halor ka jingbthah jong ka Commission ba iadei bad ka jingpynkynriah bad jingthungkam ia ki Ophisar ha ki District bapher bapher hashuwa ka 15 tarik u Nohprah.
Ka shithi bala pynmih da u Senior Principal Secretary ka ECI u Narendra N Butolia ha ka 4 tarik u Naiwieng kala ong “Ka Commission kala bthah biang ba ka jingpynkynriah/thungkam ia baroh ki Ophisar dei ban leh kat kum ka jingbthah ka Commission bad ba ki Chief Secretary lem bad ki DGP kin hap ai ia ka kaiphod aiu bala leh sha ka Commission hapoh ka 15 tarik Nohprah”.
Ka ong ba ka ECI ka ju pyntreikam ia ka Policy ba ki Ophisar ba iadonbynta ha kaba pyniaid ia ka elekshon ha ki Jylla/UT kim dei ban shah thungkam haki jong ki District ba kha ba pun ia ki (home district) lane ki jaka ba kila shakri la slem bha.
Namar kata,ka Commission kala rai ba ym dei ban don ki Ophisar ba pyniaid ia ka elekshon ba kin iai bteng ban don ne shakri ha ki District ba don mynta (revenue district) ‘Lada u/ka ki don ha ki District lajong, lada u/ka kila pyndep lai snem ka jingshakri ha kine ki district ha kine ki saw snem bala leit noh lane ban sa pyndep lai snem shuwa ka 31 tarik Lber 2023”.
Ka ECI kala ong ruh ba lada don ki Jylla ba rit bad ba don tang khyndiat ki district, ki mad jingeh ha kaban pyntreikam ia ka jingbthah ka Commission, ki lah ban pynpaw ia kane ryngkat kid aw sha ka Commission lyngba ki CEO ba kin lait bad ka Commission ruh kan sa pynmih ia ka jingbthah lad aka sngew ba ka long kaba donkam.
Haba phai sha ki District Ophisar, ka Commission ka ong ba kine ki jingthah ki dei ban pyntreikam ym tang ia ki Ophisar bala thung thik na ka bynta ki kam elekshon kum ki DEOs, Dy.DEOs, RO/AROs, EROs/AEROs, ki Ophisar bala thung kum ki Nodal Officer hynrei kan long ruh ia ki District Ophisar kum ki ADMs, SDMs, Dy.Collector/Joint Collector, Tehsildar, Block Development Officers lane kino kino ki Ophisar kiba iaryngkat kyrdan kiba shah thung ban leh ia ki kam elekshon.
Ia ki Ophisar Pulit, ka Commission ka ong ba kine ki jingbthah kin treikam ruh ia ki Ophisar ka Tnad Pulit kum ki Range IGs, DIGs, Commandants ki State Armed Police, SSPs, SPs, Addl SPs, Sub-Divisional Head of Police, SHOs, Inspectors, Sub-Inspector, RIs/Sergeant Majors lane ki Ophisar ba ryngkat kyrdan, kiba hap khmih ia ki kam pahara lane ban buh ia ka kynhun Pulit ha ki District ha ka por elekshon.
Ka ECI ka ong ruh ba ki Ophisar Pulit kiba shah thung kam ha ki tnad kum ka computerization, special branch, training bad kiwei kiwei, kim shym la shah kynthup satia ha kane ka jingbthah.
Ka ECI ka ong ba ki Pulit Sub-Inspector bad kiba kham halor, kim dei ban shah thung ha ki District ba ki wan ne home district. Lada ki Pulit Sub Inspector kila pyndep lane dang ban pyndep ia ka jingshakri b alai snem n aka saw snem hashuwa ka cutoff date ha ka Police Sub Division, kila dei ban shah pynkynriah noh sha kawei pat ka Police Sub Division ka bym hap ha ka Assembly Constituency jong ki. Lada kane kam lah ban long namar ka jingrit ka District, ia kine ki Ophisar dei ban pynkynriah noh shabar jong ka District.
Ha ka por elekshon, shibun bah ki Nongtrei kila shah thung ban leh ia kiba bun ki kam elekshon bad ka Commission kam don jingthmu ban pyndkoh ia ka jingshakri jong ki da ka jingpynkyniah kam.
Namar kata, kane ka policy pynkynriah kam kam treikam satia ia ki Ophisar kiba don ha ka State Headquarter jong kine ki Tnad bad ki Ophisar ki bym iadonbynta ha ka elekshon kum ki Doktor, ki Engineer, ki Nonghikai bad kiwei kiwei ruh kumjuh.
