Nongpoh, Naiwieng 06: Ki nongialam jong ka seng HANM, HYC, UHM mynta ka janmiet sngi U Blei, ki la ioh ban bat haduh 25 ngut ki bar jylla kiba dang thmu ban leit trei bylla sha Nongstoiñ. Ia kine ki bar jylla la ioh bat ha Umran Diary ha ka por 5 baje janmiet.
Katkum ka jingtip ba la iohlum, la ong ba ki dkhot jong kitei ki sengbhalang ki la ioh jingtip ba ka don kawei ka kali traveller AS 25-BC- 6247 kaba la kit ia ki bar jylla, kaba dang thmu ban leit buh ia ki sha Nongstoiñ na ka bynta ban tei ia ka pandal na ka bynta ka prokram jong u Myntri Rangbah ka jylla Meghalaya.
U Bah Pateng Myrsing, President ka HANM u la pyntip, ba ki dkhot kila ioh jingtip halor kane ka jingwan jong kine ki bar Jylla bad la ialam ia ki da u Halim Sheikh uba dei na Dhubri Assam.
U la iathuh ba ki dkhot ki la pynap shrip hakhmat kawei ka petrol pump ha Umran Diary bad ha ka por 5 baje janmiet ki la ioh ban bat ia katei ka kali ban pynlong ia ka jingtohkit.
U iathuh ba ha ka jingtohkit la shem ba kine ki bar Jylla kim don satia ia ki kot ki sla kiba biang bad kumta kila aiti noh ia kine ki briew sha ka Umsning Poilice Station ba kan pynlong ia ka jingtohkit ba bniah bad ban pynphai biang ia kine ki briew sha Assam.
