Agartala, Naiwieng 05: Hapdeng ka jingpynjur ia ka jingpahara bad ki jingtohkit kiba dang iaid shakhmat ha kaba iadei bad ki kam iaumsnam kiba la jia naduh ka sngi Balang ba la lah hapdeng ki nongkyrshan ka sorkar synshar BJP bad ka liang pyrshah Congress kaba la jia ha Bishalgarh hapoh Sepahijala district ka Tripura, ka jingiakynad ka dang iai bteng ha ka sngi kaba lai hadien ba kala mih biang ki jingialeh markylliang ha kane ka miet sngi Palei ba la lah.
Baroh ki artylli ki party liang pyrshah, kata ka CPM bad ka Congress kila ieng iatylli lang kawei ban pynpaw pyrshah ia ka tnat pulit ka Tripura hynnin ka sngi Thohdieng da kaba kynnoh ba ka kynhun ki pulit hapoh ka jingialam jong u SDPO ka Bishalgarh u Rahul Das kila pynpaw pyrshah pyrshah ia ka jingiatreilang bad ka BJP.Ki nongkyrshan ki liang pyrshah kila ngat ha ka jingshah thombor hakhmat ka jingiadon lang jong ki bor pulit, ong kitei ki party liang pyrshah.
Hadien ba kane ka jingiakynad kala saphriang sha kiba bun kiwei pat ki jaka ha ka thain shathie ka Tripura bad ha Gomati district ha kitei ki 24 kynta ba la dep, ki party liang pyrshah kila dawa na ka bynta ban weng kam noh mardor ias u Rahul Das.
U nongialam ka liang pyrshah uba dei ruh u Myntri Rangbah (CM) barim ka jylla, u Manik Sarkar ula ong; “Ki bor jong ka ain kila pulom lut ha Tripura hapoh ka jingsynshar jong ka BJP, bad kala nangkham sniew shuh shuh katba nang mih ki sngi.Nga kyrpad ia baroh ki party bym don jingiadei bad ka BJP ban iasnohkti lang ha ka jingiakhun pyrshah ia ki kam thombor jong ka BJP bad ka sorkar jong ka khnang ban lah pat ban wanrah ia ka synshar paidbah kaba shisha ha Tripura.”
Ki tyllong khubor na ka thain kila ong ba haduh kumba santylli ki iing ki sem jong ki liang pyrshah CPM kila ngat ha ka jingshah pynjulor bad bun ngut ki nongkyrshan jong ki party liang pyrshah kila shah thombor ha ki kynhun runar kiba la wan da ki thuk thuk ia kiba la kynnoh ruh ba kidei na ka kynhun BJP ha kane ka miet sngi Palei ba la lah.
Nalor kata la kynnoh ruh ba na ka liang ki pulit kila thombor ruh ia ki kynthei kiba dei ki dkhot ka longiing jong uwei pat u nongialam Congress, u Gouranga Sarkar, kata ha ka por ba um shym la don ha iing ha kane ka jingwan khynra jong ki pulit.
“Ki pulit kila banbor bad pynbor ia ngi ba kin mih noh na ka party lada ngi kwah ban im da ka jingsuk,” kynnoh u nongialam Congress uba dei ruh u MLA u Sudip Roy Barman hadien ka jingiakynduh ia u heh pulit u Amitabh Ranjan hynnin ka sngi Thohdieng.
