Aizawl, Naiwieng 05: U sub-divisional officer (SDO) ka tnat bording ka Mizoram uba don ha ka thain shathie ka Lawngtlai power division hynnin ka sngi Thohdieng ula shah sospon noh ha ka sorkar jylla halor ka jingkynnon leh thurmur kaba lam sha ka jingiap jong uwei u lineman shi sngi hashwa.
Une u lineman ia uba la tip kyrteng kum u Francis Rochungnunga 30 snem rta, uba dei u nongtrei jong kane ka tnat hapoh ka thain, u dang leh ia ka kam repairing ia ka lain bording ha ka sor rit Lawngtlai hadien ba kala don ka jingpynmeh kynsan ia ka lain bording kaba la pynlong ia u ba un khlad hashen ha kane ka jan miet sngi Palei ba la lah.
Kham hadien ha ka por mynmiet ki paidbah kila ialum lang hapoh ka ophis jong ka tnat bording ha katei ka thain ban dawa ban pynioh ia ka jingbishar hok na ka bynta une u nongtrei ba la khlad noh.
Kine ki paidbah kila iapra noh tad hadien ba u myntri ka tnat kam bording u R Lalzirliana ula pynthikna ha ki ban pynshitom ia ki briew kiba donkti halor kane ka jingjia.
Sa uwei pat u nongtrei uba don hapdeng ka kam hapoh ka control room hadien ba katei ka jingjia kala jia ula ngat lang ha ka jingshah kynnoh kam pyniap ha kaba la rejistar ruh ia ka case pyrshah ia u hapoh Lawngtlai police station, ong ka khubor pulit.
Na ka liang ki tyllong khubor kila ong ba ka kurim jong utei u lineman uba la khlad noh kan ioh ban rung kam bujli ha ka jaka ka jong u.
